Shillong: Hadien wa da mih ka khubor wa ka sorkar em ko yei thmu wow chna noh da ka Shopping Mall ha i thaw yong ka ‘Iconic Place’ næ ka thaw lai pyngngad ha Barik, neiliang kiwa boon wa lang da pynsñiaw ki yei pyrchah, wa kynthup nadooh ki seiñbhalang wa ki bru samen. Tangwa wot hapyrdi ini i pynsñiaw yong kiwa boon wow pyrchah ya ini i thmu yong ka sorkar, neiliang u symbood montri rangbah ka jylla uwa pait leh ya ka chnat PWD (Roads), u Prestone Tynsong da ong u wa ka sorkar daw lai ko chakhmat wow chna da ka ‘Standard Shopping Mall’ ka wow kynthup leh ya ki thaw wow pynemkaam da ki khynnah wa ki khynroo khyllood.
U Prestong da ong u wa i pynyirngam ya ka Shillong ym em thaw de wei man ko kawa eh, deiwa pynrap wa lada kwah wow yoo yaka sor kawa yirngam, hap wow sdang na New Shillong, wei ka sorkar da pyntikna ko wow pynneh ya i yirngam ha ka Shillong kawa thymme.
Katkam i ong u montri, ya ka Barik Point da kær soodong da ki sarok, wei ym ye wow pynyirngam ya katai ka thaw, wei kamwa man kattæ da em leh ka Park hajan yong katai ka thaw ya kawa daw pynkylla yirngam chooh chooh hadien wa kyrriah ya ki mrad cha ka State Zoo kawa daw booh ha Umtrew.
Kam wow pynkynmoo wa ka chnat Urban Affairs ha ka 17 tarik u Naiynri 2019 da pynman ko da ka yakob pynwandur neibynta wow chna da ka Iconic Place næ ka thaw pynsah naam ka wow man ka kynja Park. Ha katai ka yakob da jop da u Architect uwa na Shillong, u Aiban Mawkhroh deiwa ya krehlang wa ka Flying Elephant Studio na Bangalore.