U CEM ka Jaiñtia Hills Autonomous District Council (JHADC), u Thombor Shiwat ynne da wanrah u ya ka Bill wa tip kam ka “The Jaintia Hills Autonomous District (Village and Town Development Council) Bill, 2023″ yow thung noh da ki Village Development Council wa ki Town Development Council yow pynkrehkaam ya ki kaam pynroi ka Council.
Kamwa man kattæ ki kaam pynroi ka JHADC da pynkrehkaam da ki Dorbar Chnong lyngba ki Development Committee tangwa ym em aiñ wow pait yeini yow man ini i kaam wa khooid wa suba.
Ki dkhot kini ki Village wa ki Town Development Council toh u man ki kiwa chong chnong wa pura kiwa da sah chi thaw ym duna ya 12 snem wei ymtoh u man ki kam kiwa chong chnong kiwa wan kreh hi-eh na kiwi ki chnong ki thaw wei emkaam leh u man ki kiwa chong chnong wa pura ka jylla Meghalaya kiwa na ki jaitbru Pnar, Khasi, War, Bhoi, Biate wa ki Hmar (kiwa chong chnong ka Khaddum wa Sialkan).
Kini ki Development Council toh u em ki ya u Chairman, Vice Chairman, Secretary, Assistant Secretary, Treasurer wei ymtoh u duna 10 ngut ki dkhot heiwa 3 ngut toh u man ki ki kynthai ki wow kitkhlieh yei krehkaam namo i wym krehkaam kini ki Development Council. Kini emkaam u man ki kiwa da dap 25 snem i rta wa chaneiñ wei ymtoh leh u man ki kiwa da dep chah kset patok palat 6 bnai. Ymtoh leh u man ki kam ki dkhot ka District Council wa kiwa kreh ha ka sorkar jylla waka sorkar pyrdi, ki MLA, ki MP wa ki MDC.
U man ki kam ki dkhot ym duna chi snem wei ymtoh palat 3 snem wei hap ki leh wow yoh yei mynjur na ka Council wow man ki kam ki dkhot.
Ya ki dkhot ye wow pyndam ki lada ymem man ki kiwa biang hei bor pyrkhat pyrdaiñ, ki wym jooh wan cha ka yalang ka Development Council wa kiwi kiwi de ki daw. Kiwa chah pyndam ym yoh laad de ki wow man biang kam ki dkhot.
U Waheh Chnong u man u leh kam u Chairman kini ki Development Council wei lada jia wym em waheh chnong neidaw wa yap, wa chah pyndam da ka EC ka JHADC, u Acting Waheh Chnong u man u kam u Chairman deiwa thung ka EC kamjooh leh lada jia wa ki dkhot yut ki lane chah pyndam ki.
Kini ki Development Council toh u yachem ki ym duna ya chisien 3 bnai.
Ki kaam wa kini ki Development Council ye ki wow leh toh nadooh wow chna sarok, ki dooid, ki nala, ki Dam, ki thlu um wa kiwi de ki kaam pynroi wa emkaam ka chnong wei wow yarap leh ya ka District Council wow pynkrehkaam ya ki kaam pynroi.
Ye ki leh wow yaleh yow yoh Grant, ki Subsidy, Donation na ka sorkar kamjooh na ki Non-Government Agency yow pynkrehkaam ya ki kaam pynroi hapoh ka chnong ka thaw nadooh ki kaam wa yatoh wa i jhep, i khooid i jngiar, ki pynsñiawthooh paidbah, ki kaam wa yatoh waka niam wa dustur riti, ki kaam rep, i psan dakha, i ri ngap wa kiwi de kiwa ye wow pynmih poisa.
Ya ka poisa wa da pynemkaam da kini ki Development Council daw pynman da ka Audit wa daw leh da u Auditor u wym toh u dkhot ka Development Council.
Ini mut i wa kini ki Development Council emkaam ki wow em ya ka Village Development Council Fund lane ka Town Development Council Fund wei ye ki leh wow yoh poisa naka sorkar pyrdi, sorkar jylla wa naka District Council.
Kini ki Development Council hap ki leh wow thung ya uwi u dkhot wow man kam u Public Information Office (PIO) yow juab ya ki RTI wei ka District Council leh daw thung ki ya u Appellate Authority hapoh kani ka Scheme.
Ka District Council daw thung ko leh ya ki sahep wow pait yei pynkrehkaam kini ki Development Council ya ki kaam wa da yoh ki.
Ya kani ka Bill daw yatai chwa ka chwa wow phah cha u Lat yow yoh yei mynjur na oo yow man aiñ.
