Maham joor ka JYF ya kiwa khayi masi kiwa noh roi ya ki masi wa yap

Jowai: Ka Jaiñtia Youth Federation (CB) da dap ko da i sñiawkhia hajrong i chim kabu kiwa khayi masi deiwa noh roi ya ki masi wa da yap harood sarok wa ha ki lunti syngkieñ.

Ka seiñ da ong ko ini i noh ya ki masi wa da yap da pynmih ya i smatung kawa chyrkhei bha wei da booh ko leh ya i maa kawa khroo ya i chait i khiah ki paidbah wa kiwa lai wa wan kiwa hap riñ mynsien yaka lær wa smatung.

Ka seiñ ynne ka sngi 8 tarik heipor kamwa 12:30 i sngi heipor wa dang lai emkaam lyngba ka Jowai Bypass da chem ya kawi ka masi wa da yap kawa da noh da kiwa khayi masi tooh harood sarok Jowai Bypass. Hawa yatoh wa ini, ka seiñ da maham joor ko ya waroh kiwa khayi masi pyrchah yaka aiñ kiwa leh ya ini wei lada chem daw leh da iwa eh ya ki.

Ka seiñ ka kyntu ko ya ki bor ka aiñ wow chimkhia hawa yatoh i noh roi ya ki masi yap khnang wym wanrah ko ya iwon iwon i doohnong ya ki paidbah yong i.