Ka MLA ka Sutnga Saipung, ka Santa Mary Shylla ynne da lai pait ko ya ka Lumshnong wa Umkiang PHC heiwa da yaklam ko wa kiwa kreh kamjooh kiwa wan thooh dawai wow sñiawthooh yei eh i khor wa chem ki. Da chem leh wa kini ki yung sumaar emkaam wow chna pynmiat ya ki heiwa da kular ko wow yaklam wa ka sorkar.
Ka MLA da lai pait ko leh ya u sarokbah NH06 na Lumshnong cha Malidor chirup wa ki sahep na yung krehkaam u DC wa ka NHAI heiwa da khana ko yei sñiawkhia hajrong i man i long wa i sih uni u sarokbah ha kiwa boon ki thaw.
Da phah ko leh ya ki heh ka NHAI wow chna pynmiat noh ya ki bynta kiwa da sih khamtam ki thaw wa chong-um deiwa maham wa lada ym leh yeiwa emkaam daw yaklam ko yeini wa ki bor wa hajrong ka NHAI.
Ha kani ka sngi ka MLA da yachem ko leh wa ki bru waheh na ki chnong wei da kular ko wa ki PHC wa u sarokbah NH06 daw yaklam ko yei man i long ki wa ki bor sorkar.
Ha ini i lai sylli da emlang u waheh chnong ka Umkiang, Pyrtakuna, Lumshnong wa kiwi kiwi.
