Jowai: Ka seiñ 6 Shnong Wah Lukha Association ynne ka sngi da yieñ ko wow pyrchah yei thmu ka JHADC wow lilam ya ka wah Lukha cha ki bru samen nadooh na chka ka wah Malahe hadooh wa poi u pood ka ri Bangladesh.
Ka Council ha ka 1 Khonchonglad (Nov) uni u snem da pynmih ko ya ka wyrta wow lilam ya ki wah wa em hapoh u pood yong ka cha ki bru samen wow tong dakha na ki thwai ki wah hadooh ka 31 Wisu (March) 2020.
Ynne ka sngi kam chibynta wow pyrchah yeini i thmu ka Council, ka seiñ da lai yachem ko ya u CEM ka JHADC, u Thombor Shiwat ha kamra krehkaam yong oo wow kyntu wow pyndam u lilam ya kani ka wah.
Ya ka seiñ kawa kynthup ya ki chnong Sakhri, Lumtongseng, Sonapyrdi, Shymplong, Kuliang wa Borsora wei da kyrchaan ya ka da ka Dorbar Chnong Umkiang wa Pyrtakuna dei mynsien wa khia wow yada ya kani ka wah neipor cheipor mih ki wow pynneh pynsah ya kani ka wah.
Ynne ka sngi poh i yahkhmat u President wa u General Secretary ka Association, u Womsar Talang wa u Daiapherbha Lamare, u Waheh Chnong ka Umkiang u Lasting Pala, ki waheh na ki chnong wa kai tymbud ka wah Lukha da pynsñiaw ki yei daw wa pyrchah ki yeini i thmu ka Council.
Hadien i yachem wa u CEM, u Womsar da ong u wa ki paidbah hi na kini ki chnong pyrchah joor ki ya ini i thmu ka Council wei neiliang u CEM ymye u wow kular iwon iwon lait na i kular wow yaklam yeini ha ka yalang ka Executive Committee.
Da ong u wa neiliang u CEM da pyntip u wa ki wah em ki hapoh i pait i yoo ka Council, tangwa ka seiñ phylla won ko u yoo wa ka Council ym em u leh ko iwon iwon wow yada ya ka wah.
“Dang nachwa jooh em ki Forest Guard (ka JHADC) kiwa yada ya ka wah ha ki snem 1993-94 na i khloh moo wa kiwi ki kaam wa pynsih ya ka wah tangwa katni won ym em de ki,” da kynmoo tamdien u Womsar tangwa katni manda sdang ki chnong wow yada ya ka, ka Council won chim kabu ko yeini wow dai pathan ya ka.
Neiliang u Daiapherbha da ong u wa ka seiñ pyrchah ko yeini ymtoh neibynta i myntoi samen tangwa neibynta i myntoi ki paidbah ka thaaiñ wa ka ri-loom Jaiñtia waroh kawi neibhah u dai ya ka wah du T. 1.5 lak ya ki bru samen yei myntoi samen katwa lada pynlai da ka chnong u yoh myntoi lang waroh salonsar.
Da ong u leh wa katkam wa man katni ki bru yoh ki hadooh 4-5 kilo ka dakha samen ha ka chi sngi tangwa manda dai ya ka wah, kiwa thied ye ki wow tong dakha katwa ngait iwa ye u ktah ya ki dohum ha kani ka wah wa kamjooh ya ki bru wa im ja na ka.
Chooh chooh ka seiñ da kyntu ko ya ki bru samen (wa angnood) wow dam u thied ya kani ka wah neibhah wa man i pyrchah ya i rai ki dorbar chnong iwa kynthup wow khang pyrchah wow tong ya ki dakha wei wow dat bom ha ka wah kamwa da leh na ki snem wa dadep.
“Lada jia wa em i doohnong ya kiwa thied u man i i bahkhlieh ka Council,” da ong u Daiapherbha deiwa pynrap wa ki bor chnong wa ka seiñ u khang bait ki ya ki kaam wa leh da kiwa thied ya ka wah.
U Lasting Pala uwa man kam u waheh chnong ka Umkiang, da ong u wa ka chnong kyrchaan pura ko ya ka seiñ wei kyntu u leh ya ka Council wow ekti noh ya ka wah wow pynlai da ki chnong kiwa kai lyngba ko kam wa man ha ki por warim.
Ka seiñ da kyntu biang ko ya kiwa thmu wow thied ya ka wah wow pyrkhat arsien ki chwa wow thied ki ya ka wah neibhah wa ymkwah ko wow man ki kiwa doohnong hadien habood deiwa kyntu leh ya ki wow yakrehlang wa ka seiñ kamjooh ki chnong ym du neibynta ka myntu tangwa neibynta ka mynried ya ka pateiñ wa daw wan.
Discussion about this post