Jowai: Ka seiñ All Jaiñtia Students Union (AJSU) lyngba u President yong ka, u Bantei Sari da maham ko ya ki dkhot ka seiñ kiwa lai paan yarap na ki paidbah wa na kiwon kiwon ki thaw.
Da maham ko ya waroh kiwa kitkaam nadooh ka Seiñbei ki Unit wa ki Circle ka Seiñ wa lada emkti ki wow dawa poisa na kiwon kiwon ki thaw næ ki bru paidbah, ka seiñ daw beh noh ko ya ki.
Da kyntu ko ya ki paidbah wa lada em kiwon kiwon kiwa paan yarap khlem soi pyrtuid u President kamjooh ka chaap (Seal) wow pyntip cha uni u Number 9774236792.
Da ong ko wa ymye u paan yarap khlem yohbor na u President neibhah wym kwah ka seiñ u chah dai sarom.
Chooh chooh da ong ko wa lada ki paidbah kwah ki u e yarap, ka seiñ pdiang ko yeini dei tip u President wa ki dkhot ka EC.
“I ymtoh ka seiñ business wow dawa poisa na ki Paidbah, i toh ka seiñ wow kreh neibynta i emkaam ki paidbah” da ong ka AJSU.
Heijooh i por da ong ko wa daw yachem ko wa ki 7 ngut ki MLA ka ri-loom Jaiñtia wow paan ya ar tylli ki kari kit metyap namo ka Mortuary Van ha Shillong neibynta wow chakri ya ki paidbah ka ri-loom Jaiñtia waroh kawi.
Discussion about this post