Shillong: Ka Confederation of Meghalaya Social Organisation (CoMSO) da pynsawa joor biang ko yei dawa Inner Line Permit (ILP) ynne ka sngi deiwa lai paidbah na Mawlai Mawdatbaki chadooh Motphran, heiwa da ki spah ngut ki dkhot na ki seiñ wa em ha ka CoMSO da ya mih paidbah ki.
Ka CoMSO da pynman ko ya ini i lai paidbah wow dawa ILP ynne ka sngi kawa man leh ka lyngkhooh sngi yap wa 158 yong u khlawait ka ri Khasi-Jaiñtia, u Woh Kiang Nangbah kam i dak wow kyrsu thiah ya ka jaitbru wow yakhun na i wan buhai chnong ki bru wa na baar, deiwa kbai pynrem yei mutlop wei ym mano ka sorkar NDA yei dawa pynkrehkaaam ya ka Inner Line Permit (ILP).
I lai paidbah da sdang na khyrdop yong ka Polytechnic kawa em ha Mawlai deiwa lai lyngba na Mawlai Petrol Pump wei da ku na Jaïaw, Mawkhar wei da pynkut won ha Motphran hapyrdi i sonteri ki pulit wa ki bor pynlai District, khnang wym em ki jia wa sñiawsih.
Ha kani ka yakhih da yoh leh i klam na kiwa yahkhmat yong ki seiñ kiwa em hapoh ka CoMSO wa kynthup ya ka SWKSU, CORP, HANM wa HYC.
Ka sur na kani ka lai paidbah yong ki seiñbhalang toh wa ha u snem thymme 2021 daw pynjoor ya ki yakhih lada ka sorkar ym bna ko wow e ya ka ILP ha ka jylla Meghalaya.
U General Secretary ka CoMSO, u Roykupar Synrem da maham eh u leh ya kiwa mihkhmat ka jylla, wa kynthup ya ki 60 ngut ki MLA, 90 ngut ki MDC wa 3 ngut ki MP lada ym ye ki wow yasaaid neibynta wow pynyoh ya ka ILP. Da ong u wa lada ki paidbah ye ki wow thung syiem ya kiwa mihkhmat chisien san snem, ye ki leh wow pynhiar khet ha u snem 2023 manda toh i por.
