15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1
Advertisement ad1

Phooh ka leh warom ka SKSR-12 Daloi yaka lyngkhooh sngi yap wa 158 u Kiang Nangbah

Advertisement ad1
Advertisement ad1
Advertisement ad1

Ka Seiñ Kyntu Seiñ Raij- 12 Daloi da pynman ko yaka yalang kynmoo warom yaka sngi yap wa 158 snem u khlawait ka ri Jaiñtia u Woh Kiang Nangbah ha kti ka sorkar pharæng ha u tylle pasi ha ka 30-12-1862, wei ya ini da pynman ha ka yung krehkaam yong ka seiñ ha Thadmuthlong C Phramer, West Jaiñtia Hills District, kawa da sdang pynman heipor 10:30 i step kawa pynlai da u Wom Chyrmang, President ka Seiñ Kyntu Seiñ Raij-12 Daloi deiwa sdang da i pynhær ya ka lama yong ka seiñ da u Mario Biam uwa man u Adviser ka seiñ wei da pynbood sa i booh syntu wa kynthup lang yaka Seiñ Raij Muthlong, Seiñ Raij Nangbah wa ka Seiñ Raij Chnong Sabahmuswang.

Ya i ngooh Blai da yoh na u Meliyo Lyngdoh, President ka Seiñ Raij Muthlong wei hadien da yoh ya i klam pdiang burom da u Treyo Lyngdoh uwa man u Treasurer ka Seiñ Kyntu Seiñ Raij-12 Daloi uwa na ka Seiñ Raij Mukhla, hadien ki kyntien pdiang burom da yoh ya i rwai pdiang da ka Khynroo Khyllod Committee ka SKSR 12 Daloi.

Ha kani ka sngi da yoh leh ya i klam chaphang i im wa i rukom man u Woh Kiang Nangbah kam uwa yahkhmat wow yaleh pyrchah wa ka sorkar pharæng iwa da yoh na u Standbyme Sari na ka Seiñ Raij Mukhla uwa man leh u Publicity Secretary Cum Art & Culture Committee ka SKSR-12 Daloi, hadien ini da yoh ya i chaad tynre da ki khon khynroo khyllood ka Seiñ Raij Muthlong.

Ha kani ka sngi ka Seiñ Kyntu Seiñ Raij-12 Daloi da pyman leh ya i yasiat khnam pyllah ha pchem ka yung krehkaam Seiñ Kyntu Seiñ Raij-12 Daloi wei ha kani ka yasiat khnam da yoh nyngkong da ka Seiñ Raij Khliehriat, wa ar da ka Seiñ Raij Nangbah wei hei wa le da yoh da ka Seiñ Raij Dienchynrum.

Khaddooh da yoh ya ki kyntien e khublei na u Moly Phawa na ka Seiñ Raij Chnong Sabahmuswang uwa man leh u Vice President ka SKSR-12 Daloi, wei ka SKSR-12 Daloi da e khublei ko leh ya ka bor District kiwa da e laad ya ka seiñ wow pynman ya kani ka yalang ryngkat wa ki kyndon wow yada na u khñiang COVID-19 deiwa pynbiang ya ki thaw siatkti wa ki dawai sait kti. Heijooh i por leh ka seiñ da e khublei ko ya ki pulit ka Phramer Police Outpost kiwa ya emlang ynne ka sngi.

Share this:
Previous

Maham ka CoMSO wow pynjoor yakhih ILP ha u 2021 lada ym mano ka sorkar

Next

Kynmoo maya tympang ka AJYWO ya u Kiang Nangbah