Ka mukotduma wa yatoh wa i jhep ha Jowai da chong bichaar biang ya ka ynnin ka sngi da ka yung bichaar ka Meghalaya High Court heiwa neiliang ka Synjuk Ki Waheh Chnong Jowai da khana ki wa ym pu em kit yei jhep na yung ki bru da ka Jowai Municipal Board katwa na ki thaw wa pynman yaw kit hi yei jhep hapoh ki truck wei da lai noh ya ki cha i thaw wa pynemkaam chi por.
Neiliang ka High Court da ong ko wa emkaam leh wow kit yei jhep iwa na yung kamjooh deilang kiwa em cha ki yaw wa cha luti syngkieñ.
Ka sorkar da pyntip ko wa ki chnong da pyrchah ki wow e thaw wow pynemkaam kam i thaw noh jhep wa pura, hajrong ini ka yung bichaar da ong ko wa hap wow thooh laad da ka sorkar kamjooh ki bor District yow pynbait yeini wei ka yung bichaar ym ye ko wow pynmih hukum iwon i thaw wa biang u noh jhep.
Ka sorkar da khana ko leh wa kattæ da sdang wow pynkhreh yow booh ya ka Solid Waste Management kawa chongdor palat T. 13 klur.
Ka yung bichaar da ban joor ko yei emkaam wow pynyoh smat yei thaw noh jhep hanla jngai katwa jngai leh na chnong Jowai neibhah ym man wow yang wei wow chah u lang i jhep la ha yung lane ha ki thaw paidbah.
Kamwa da pynmih ha ka hukum wa nachwa da kdaw ya iwa hap wow leh smat neibynta iwa katni wa ki kaam neibynta iwa daw chimpor kamtæ ka yung bichaar da ong ko wa ym toh de u pynslem yeini waroh.
Da kdaw leh yei maa wa mih nei wan u slap manda khleh lang ka um wa i jhep iwa daw pynmih ya ki kjut wa boon jait heiwa kattu ka samoi u slap leh dapoi ko.
Ka yung bichaar da pynche ko wa ka ym ye ko wow jied ya iwon i thaw noh jhep wow pynemkaam wei ini toh i kaam yong ka sorkar jylla wa ki bor District wow kreh chitom ki wei ym toh wow pyntieñ bru deiwa pynemkaam i pyrtuid ka yung bichaar.
“Ini ym toh iwa ye u pynbait da ka yung bichaar, tangwa ka yung bichaar ym swe ko wow pynmih hukum da kiwa khor neibynta ka sorkar jylla wa ki bor District lada da poi cha u pood wa da booh hei maa yei mynsien bru neidaw wym chimkhia wow leh yeiwa emkaam kam kiwa da pynkit wow pait yeini waroh,” da ong ka yung bichaar.
Ka yung bichaar da ong ko leh wa kattu la ar bnai kiwa chong chnong ka Jowai da man ki kiwa yaichah yeini chitom wei da yooluti wa ha kini ki 10 sngi daw ye u pynbait yeini i kaam.
Ya kani ka mukotduma daw chong bichaar biang ha ka 03-06-22.