Jowai: Ki ar tylli ki seiñbhalang ka Jaiñtia National Council, Central Body wa ka Khasi Student Union ynne ka sngi hapoh i yahkhmat u Wanshwa Suting President ka JNC, hadien wa yoh ujor ki jingujor na ki manbei manpa ki khynnah skur wa na ki paidbah da lai yachem ki ya u Deputy Commishioner ka East Jaiñtia Hills District, Khliehriat heiwa da e ki leh ya ka dorkhat wow dawa na ka office u Deputy Commissioner wow khang ya waroh ki dukan wymhoi u dai sikret namo duma ya ki khynnah skur.
Kini ki ar seiñ da ong ki wa katkam wa man katni aw jan waroh ki dukan hapoh ka District dai duma dai sikret ki wathadooh ya ki khynnah skur wei ini man i kam i sdang i sih wei iwa ktah leh yei doh i pran yong ki.
“Em chiboon ki khynnah skur kiwa baam duma wei dih sikret, du neibynta wow pyllut por kyndeh wei ymtip ki wa ini daw man i i myllien wow riñ ki hadooh wym ye de ki wow kiar na ini i kaam” da ong u Streamly S. Niangti.
Da daw kini ki ar seiñ wow pynchitom ya ki Restaurant kiwa chah wei elaad ya ki khynnah skur wow dih ya ki mar pynmuaid kam i kiad du wow kamai spah, neibhah jooh chem ki yeini dei langær hapoh District.
Hei yatoh wa ini neiliang u DC da kular u wow chimkhia yeini i dawa ki ar seiñ neibynta ki khynnah skur wa ka mynried kawa tyrchaaiñ yong ki.
Heijooh i por da maham joor ki leh ya ki dukan kiwa leh pyrchah ya ini i kaam.
Ya kani ka jooh ka dorkhat da li e ha khmat u SP ka EJH, u Secretary ka Synjuk ki Rangbah Chnong wa cha u MLA ka thaiñ u Justine Dkhar.
Discussion about this post