Maham ka JNC wow chimkti da ka hi lada ka JHADC ym yada ko yei khayi pateiñ ki tre chnong

Ka JNC-CEC hapoh i yahkhmat u General Secretary, u Wanshwa Suting da lai ko wow yachem wa u EM wa pait ya ka chnat ka Trade yong ka JHADC hajrong ka phang wow pynsñiaw yei sñiawkhia iwa khroo hawa yoo wa i mantre ya ka khayi pateiñ da sdang ko u chah knieh ha ki bru kiwa na baar, nadooh ki dukan dukdoh kiwa dadap sadu ki bru kiwa na baar kiwa mantre, wei i won kam ki tre ri tre chnong da man pathan i kam kiwa thied donhi. Lada kyruiñ i cha ka khih mylla sngi leh da dap sadu ki bru kiwa na baar.

Kani booh ko ya ka pateiñ ka ri hei maa iwa khroo lada ki dorbar chnong, ki Elaka kamjooh ka JHADC ym leh ki iyi iyi heipor wa biang wow yada yei khayi yong ki tre ri tre chnong.

Ka JNC da i mynsieñ iwa sñiawkhia kyrpaad joor ko ya ka chnat yong ka JHADC kawa toh u pait yeini i bynta wow pyrkhat ko kammon u kdoh u khoom yei roi yong ki dukan dukdoh yong kiwa na baar khnang yow yoh khih yoh kreh ki khon ka ri khamtam ya ki pateiñ wa daw wan.

Lada ka JHADC, ki dorbar chnong, ym chimkhia ki yeini i pynsñiaw yong ka seiñ, ka JNC neini chakhmat ym man de ko du kam kawa pait donhi, heiwa ka seiñ daw e bor ko ya ki chipai yong ka wow khynreh ya ki kot ki sla ki dukan baar jylla ha kylleiñ ka Ri Jaiñtia.

Heijooh i por ka JNC smat ko u yakrehlang wa ki dorbar chnong, ka JHADC neibynta u yada ya ka khayi pateiñ yong ki tre ri tre chnong.

Related posts

Dang em ki kattu katni ki khon ka Ri-loom Jaiñtia wym tip ki wa ki toh ki Indigenous Tribe: Lasky Rymbai

March 20, 2026

I sarom ya ka JHADC wym em ka Website wa krehkaam pynsñiaw ki MDC Liang Pyrchah

March 20, 2026

Neiliang u EM da kular u wa ka chnat yong oo smat ko wow yakrehlang wa ka seiñ wei da kular u leh wow leh yeiwa emkaam.

Sa iwi wa ka seiñ da wanrah ko ha ka yung krehkaam ka JHADC toh wow dawa wanrah noh ya ka chnat Revenue hapoh East Jaiñtia Hills khnang wow pynsuk yei rukom e chakri ka JHADC, wei wow pynsuk leh yei lai i wan ki bru ka thaaiñ khamtam ya u dooh u suk, neibhah deiwa em kani ka chnat krehkaam ha East Jaiñtia katwon tam u e ko i wanrah myntoibah wei i kyrkhubah ya ki nong East Jaiñtia.

Neiliang ka JHADC da ong ko wow yakhun ko katwa ye ko wow pynkrehkaam yeini i dawa ka seiñ wei ka leh smat ko wow lehbha wow thooh ki laad ki luti neibynta kini ki mat dawa yong ka seiñ kiwa da pynsñiaw ha ka.