Ka seiñ Jaiñtia Students’ Movement (JSM) lyngba ka wyrta na u Publicity Secretary ka Central Body, u Deijuhhi Siangshai da ong u wa ka seiñ da beiñ joor ko ya ka sorkar MDA wa yahkhmat da u Conrad Sangma hajrong i wym ap ko yei dawa ki seiñ kamai kari hajrong i ku dor i Petrol wa Diesel, heiwa hadooh katni da kynjoh cha ka 4-5 sngi i yakhih tangwa ka sorkar ym em leh ko iwon iwon.
Ini i yakhih ki seiñ kamai kari ym em ktah ko du ya ki tre wa kiwa yah kari kamai tangwa da ktah ko ya ki paidbah, kiwa dooh wa ki khynnah skur kamjooh.
Hajrong ini waroh ka seiñ da kyrchaan ko ya i yakhih yong ki seiñ kamai kari waroh kiwa em ha ka District wa ka jylla.
Ka seiñ da ong u wa lada ka sorkar ym ap ko yei dawa yong ki seiñ kamai kari, ka seiñ daw hiar madan ko wow pynjoor ya i yakhih.
