15 49.0138 8.38624 1 0 4000 1 https://wyrta.com 300 0

Maham ka KSU wa FKJGP yaka sorkar lada ym ye ki wow pynbait ya i eh ki wakreh ka 108

0 Comments
Advertisement ad1

Shillong: U President ka KSU u Lambokstarwell Marngar da ong u wa ka sorkar ym ye ko wow sait kti ya i dawa yong ki wakreh GVK EMRI, wei ka seiñ ym ye ko du wow chnong kli kti wow chong paitke yei chah lehke yei mynsien bru, wei daw mih madan ko wow chim da kiwi ki laad ki luti.

“Ka sorkar wa ki bor pynlai yaka EMRI ki hap ki wow chim ya ka kitkhlieh ya i dawa yong ki wakreh wei i ym ye i du wow chong wei paitke donhi. Lada mut ki wow yalehke wa ki dkhot ka jaitbru, i leh tip i wow yalehke wa ki bru kiwa wan wow kjit wei lehke ya ka jaitbru yong i,” maham u Marngar.

Advertisement ad1

Hawa yatoh wa i e por wow wan kreh noh hapoh chi tayaw, uwa yahkhmat ka KSU da ong u, “Ym toh du ki wa ye u maham, pait won iyi wow leh i.”

U Marngar da ong u wa toh i kitkhlieh yong ka sorkar wow pynbait wei lada ym ye ko, ka seiñ daw lai ko ka yong ka hi ka luti deilang wa ki wakreh ka EMRI.

Ha iwi i liang da ong u wa i dawa yong ki wakreh hapoh ka MEMRIWU man ko kawa chongnia neibhah man ko neibynta i bha i miat ki paidbah ha ka kjut ka chitom.

“Ka GVK EMRI ym toh ka khon khaddooh yong ka sorkar, neidaw wa ka sorkar toh kawa e kaam ya katai ka Company wei ka em ko ka hok wow tukar. I sait kti wa i kyrriah yaka kitkhlieh nawi cha wi pynyoo wa ym hoi ki ka sorkar waroh kawi,” da ong u.

Da ong u wa ki bru wa na baar wan ki cheini ym toh wa wan kreh makna ki, wa toh wa yoh bai nong ki, ka sorkar ka kyrchaan poisa ko wei ka em ko ka hok wow tuklar ya kani ka kaam.

“Lada em i jia na kani ka yakhih, ka sorkar wa ka EMRI toh ki wow chim yaka kitkhlieh,” da ong chooh chooh u.

Ki seiñbhalang wa kynthup ya ka KSU, FKJGP, MPLU ynne ka sngi da lai yahcem ki yow pynyoo yei sñiawlem ya ki wakreh ka GVK EMRI 108 kiwa chah thngan ha pchem ka yungkrehkaam ka 108 kawa em ha Lawmali, Shillong hadien wa ka chah thngan da lai ko cha ka sngi kawa khynde.

Neiliang u General Secretary ka FKJGP u Dundee C Khongsit da ong u wa ka sorkar toh u pynbiang ko ya ki Doctor neibynta ki wakreh kiwa chah thngan hadooh katni wei lada jia iyi iyi iwa ym sñiawsuk ya kitai ki wakreh, ka sorkar hap ko wow kitkhlieh neibhah boon ki seiñbhalang daw chim ki yaka jar jiar ka luti.

Katwa uwa yahkhmat ka Meghalaya People Labour Union, u Batskhem Basaiawmoit da ong u wa kamwa da pynsñiaw da ki wakreh ka 108, da jan waroh ki dawa da jan poi cha i pynbait, tangwa kawa sah toh wow pynku ya ka Increment cha ka 30% wa ka tulop 100% iwa ka Company dang chem ko iwa eh wow leh.

Kam wow pynkynmoo wa ha kani ka chah thngan da boon kiwa chah kit cha ki thaw chah sumaar tangwa ka sorkar kamjooh ka Company ym pu em leh ki iyi iy leh.

Advertisement ad1

0 Comments

Leave a Reply