Heiyatoh wa i wan ki tngoo wa tip dei ktien pharæng kam ki Capped Langur hapoh ka chnong Panaliar, Jowai heiwa da boon kiwa riñdur næ chondur ya ki, kiwa da pynka-it da pynyoosuk ya kiwa wa lai wa wan.
Kamtæ u Waheh Chnong ka chnong Panaliar, u Riquoma Rq. Laloo da kyntu joor u ya waroh kiwa chong chnong hapoh u pood u ang ka chnong wow sumaar ki ya kiwon kiwon ki mrad khloo khlem da pynsih pynchitom næ siat yap ya ki, khamtam hawa wan kam kini ki jait mrad kiwa phær, ieh yoh u roi u paar ki cheini.
Da maham eh bha ka chnong ya kiwon kiwon kiwa pyrchah yeini, lada em kiwa pynwit næ pynyap ya kitai ki mrad, chisyndon u kem ya ki chirup lang wa ka kuna wa heh bha hadien neitæ u ekti cha ka aiñ yoh ko u leh yeiwa emkaam.
Kamtæ da khut yei yakrehlang yong waroh, kam ka dak wow pynneh pynsah ya ki mrad khloo heijooh i por wow pynyoosuk ya ki tawiar sookun ka chnong.
