Ka Rot Association of Meghalaya (RAM) ha ka kyrwoh wa da phah, da dap ko dei chrai hawa kawi na ki dkhot yong ka kawa da ri da sumaar wei da yada waroh chi kattu, tangwa katni da nood ko wow chet kylla wei wow leh pyrchah syndon ya kiwa yahkhmat ka seiñ.
Ka RAM da ong ko wa kani ka bru kawa da pynpsiah dkhot ya idæ hapoh ka seiñ ha ki kajiak snem nachwa kawa tip kam ka Balahun, kawa da paan yarap wei yada heiwa ka RAM hi kam ka seiñ kawa yieñ ha ka yurim wow yada ya i hok yong ki kynthai wa em ha kini ki jait kaam ym em kyntait ko. Tangwa katni won kani ka bru da chet kylla ko ya ki waroh deiwa sdang syndon da ka kynhun wow leh pyrchah ya ka RAM kawa tip kam ka Sex Trade Opposing People (STOP).
Na ini i daw, ka RAM ym yohsa ko wow chim ya kani ka rai, wa lada e yutip ko iyi iyi leh chaphang ka seiñ næ ki dkhot yong ka ha ki bor ka aiñ, ym banse wow thaad kylla sa ya ka deiwa pynpoor ya ki Video khlemraaiñ yong ka ha ki rynsan Social Media.
Ha i jooh i por, ka RAM da maham joor leh ya kitu ki MLA wa MDC kiwa jooh myllien ha ki kam awria wa ki dkhot yong ka seiñ wei lada ki nang e buit e yumut ki ya ka Balahun neini chkhmat, ka RAM ym banse wow thaad pyrthai wot ya ki pyrtuid wa ki durkhmat yong ki leh.
Kam i dak wow pynyoo wa ym em klam ke, ka RAM da pynyoo ko leh ya i Video wa kam ki toh i yong ka Balahun heipor wa lai ko wa uwi u bru (Customer) yong ka.
Ka kyrwoh na ka D. Mawlong, Publicity Secretary, RAM.
Puræ leh: Sdang ka dkhot warim ka RAM da ka STOP
