Ka chnat puræ puthi ka sorkar Meghalaya da pynmih hukum ko hadien wa chem ko yei jia ha ki kattu katni ki skur wa em kiwa sikai skur da phah bru ki da kiwi wow lai sikai heithaw yong ki kiwa tip kam ki Proxy Teacher wei kini da lai ki wow pyndep yei kreh yong kini kiwa sikai wa da dep thung da ka skur næ kiwa thung da ka sorkar iwa man pyrchah yaka aiñ kamjooh ki Service Rules.
Kamtæ yow lait na ini da phah ya waroh ki khlieh yong ki skur ki bru samen, ki skur sorkar wa ki skur wa yoh yarap naka sorkar wow pyntikna ki wa waroh kiwa sikai skur yong i ym phah lai ki da kiwi heithaw yong ki lada jia kammon kammon leh neibhah ini da ktah ko yei puræ puthi iwa da yoo nei tlot kini ki skur ha ki Board Exam wei ya kitu kiwa pynemkaam ya kini ki Proxy Teacher daw pynchitom ya ki.
Da phah leh ya waroh ki skur kamjooh kiwa kreh wow pynemkaam ki da ka TIMS Mobile Attendance App yow pynsakhiat yei wan ki cha skur heiwa kani ka App pynemkaam ko leh yaka Face Recognition yow pyntikna wa wan da ki bru wa toh u wan cha skur.
Da phah leh ya ki skur wow booh ki yei dur kiwa sikai skur deilang wa i pyrtuid yong ki kamjooh ki Subject wa hikai hapoh ka Notice Board ka skur yow yoh waroh u yoo yeini. Ki dur toh u man ki da ki Colour Photographs da iwa heh yow chynna da waroh wei yeini hap wow leh khlem pep hapoh ka 15-02-24.
Da phah leh ya ki DSEO, DPC, DMC, SDSEO wow lai hiar ki cha ki skur khlem da pynbna yow pyntikna wym em kam kini ki Proxy Teacher ha kiwon kiwon ki skur kamjooh kiwi kiwa kreh wa da wan heithaw yong kiwi wei lada chem wa em kam kini daw hap kitkhlieh da kini ki sahep sorkar wa toh u pait ya ini.
Discussion about this post