Ka seiñ War Jaiñtia Students’ Union (WJSU) ha ka yalang wa da khut pynman jhan da u Vice President yong ka, u Heartcasing Dkhar ha ka 26 tarik uni u bna ha yung krehkaam ko wa em ha Amlarem, da yaklam heiyatoh wa ki kaam tih marpohkhyndaw hapoh ka thaaiñ War Jaiñtia wei da chim ya ka rai wa lait na i tih wa khian namo ka Minor Mining ym chah dei rukom tih waheh namo ka Major Mining ha kani ka thaaiñ.
Ka seiñ da ong ko wa da yoo wa wot deiwa thih da ka Minor Mining da kiwa em License hadooh katwon da ktah ko ya ka ramaw. Wei hanla ktah leh neiliang ka seiñ ym em pyrchah ko ya ka Minor Mining nadooh nachwa neibhah wa man ko ka laad yoh khih ha kiwa boon ki rukom ya kiwa chong chnong ka thaaiñ.
Tangwa ka seiñ da tip tikna ko wa da em kiwa da thmu wow pynheh yei rukom tih marpohkhyndaw da iwa rap heh namo ka Major Mining wei da em leh kiwa da paan License na ka sorkar heiyatoh wa ini, kamtæ ka WJSU da maham joor ko ya kini kiwa da thmu wow leh yeini ha kani ka thaaiñ.
Da ong leh wa ka seiñ yieñ skem ko wow yada ya ka ramaw kamjooh ya iwa emkaam kiwa chong chnong yow man ka roi ka paar kawa neh slem hapoh ka thaaiñ War Jaiñtia.
Discussion about this post