Jowai : Ka Dorbar Chnong Umkiang da maham ko wow khang ya ka yung krehkaam ka BSNL wa em ha Umkiang lada ym pynkrehkaam noh ko ya u Mobile Tower wa em ha Umkiang uwa da sih kattu la 7 bnai.
Neiliang ka Dorbar Chnong da ong ko wa kamwa 80% kiwa chong chnong pynemkaam ki da ki Cellone SIM Card kamjooh wa ki paidbah wa sah cha jan ka chnong Umkiang.
Kiwa heh ka chnong da dep ki leh wow yachem wa kiwa heh ka BSNL ha Shillong ha ka 26 Naikhynde heiwa ka General Manager ha kani ka sngi da khut ko ya kiwa kreh yong ka wei da phah ko leh ya ki wow chim khia ki ya ini waroh. Tangwa hadooh katni leh ym em mih ki dak ki chin na kani ka yachem.
Kamtæ ka chnong da rai ko wow e por 20 sngi u pynchna ya uni u Mobile Tower wei lada ym leh yeini u khang tala noh ya ka ophis wa em ha Umkiang ha i thaw wa e sñiawbha ka chnong cha ka BSNL deiwa yooluti wa daw pynbiang ko ya i chakri cha ki paidbah.
Ka dorbar chnong leh da maham ko ya kiwi ki Mobile Network wow chimkhia ki ya jar jiar ki network yow yoh myntoi ki paidbah.
Kani toh katkam ka khubor wa pyllait na u Waheh Chnong ka Umkiang u Pardonwell Lyngdoh wa u General Secretary u Datipshwa Nongrum.
Discussion about this post