Ka Hynniewtrep Youth Council (HYC) Education Cell deilang wa ki khynroo wa lai puræ da ya lang paidbah ki wot hapyrdi i pynkrehkaam ya ka kyndon Section 144 CrPC ha nongbah Shillong.
Neiliang u Secretary ka HYC Education Cell, u Enlang Sawian da ong u wa lada ka sorkar ym ye kow wow pynpoi ya ka poisa bai baam namo ka Scholarship hapoh chi tayaw, neiliang kiwa lai puræ deilang waka HYC daw lai khang tala syndon ki ya ka Secretariat.
Ka HYC deilang wa ki khynroo wa lai puræ da pynbna ki wow pynman yei lai paidbah ynne ka sngi yow dawa pynlait ya ka Scholarship, tangwa hachwa ya ini, ka sorkar da pynbna ko wa da dep wow pynlait palat T.169 klur ka poisa wow su ya ka Scholarship yong ki khynnah skur neibynta ka Pre wa Post Matric.
Hadien ini i pynbna yong ka sorkar, neiliang ka HYC da pynsangeh noh ko yei lai paidbah, tangwa da pynman da ka yalang wa jai jai ha khmat u mot dur yong u Bull Lyngdoh uwa em ha Malki.
U Enlang da ong u leh wa ka yaleh ym pu kut hanla da jop hadooh 95%. Da kynther u deiwa eh ya ka sorkar kawa da pynkrehkaam ya ka Section 144 CrPC wow khanglaad yei yakhih, deiwa ong wa nadooh mynnu wym hoi u pynsñiaw yei eh ki khynroo wei lada kani ka yakhih wa jai jai man ko pyrchah yei synchaar khadar paidbah, u tyngkheiñ aiñ leh smat ki wei wow lai hajir.
Neiliang u General Secretary ka HYC Seiñbei, u Roykupar Synrem da lai u wow synraan ha kani ka yalang wei da ong u wa ka seiñ u em bait ko wa ki khynroo wa dang lai puræ neini chakhmat, wei da pynrap u wa lada ym toh wa ym pynbna yei yakhih kopsar ka sorkar ym bna ko wow pynlait ya ka Scholarship.
Da ong u wa kopsar u Conrad Sangma boonkaam u du ha ki tamasa, ki Festival neibhah da pynlut poisa neibynta ki tamasa katwa ym em poisa wow su tulop ya kiwa sikai wa ya ka Scholarship ki khynnah.
