Jowai: U Dy. CEM ka Jaiñtia Hills Autonomous District Council (JHADC) uwa pait leh yaka chnat Forest, u Lasky Rymbai da maham joor u ya waroh ki karkhana pynmih khyndaw-bilat wa em hapoh u pood u ang ka Council wow pynthymme ki yaka NOC yong ki khlieh u snem.
Da ong iwa phylla wa na waroh 8 tylli ki karkhana pynmih khyndaw bilat du 3 tylli donhi kiwa pynthymme khlieh u snem kitæ toh kynthup yaka Top Cem Cement, ka Dalmia Cement waka Hills Cement katwa ki 5 tylli won ym jooh wan pynthymme de ki yaka NOC nadooh wa sdang ki yaka karkhana.
Kamtæ da maham wa lada ym wan su ki hapoh ka 30 tarik uni u bnai neiliang ka Council ye ko u pyndooh chisien don yaka NOC yong ki, nalor wym chah de u pynlait næ pynthymme yaka Trading License yong waroh ki karkhana pynmih khyndaw bilat.
Heiyatoh wa ini nadooh ka 31 tarik u March 2012, neiliang u Lat ka jylla leh da mynjur u waka District Council ye ko wow booh dor yei hok yong ka heiyatoh wa ki khyndaw ki chyiap, ki khloo ki kjam, ki um ki wah wa kiwi katkam ka Section 8 yong ka United Khasi Jaiñtia Hills Autonomous District Council (Management and Control of Forests) Act 1958 wada pynkylla daka Jowai Autonomous District Council (Administration) Act No 1 of 1967.
Kamtæ yaki karkhana pynmih khyndaw bilat da booh dor wa i su bai NOC toh T. 10 lak, katwa yow pynthymme won T. 3 lak.