Ynne heipor wa wan ka Jowai Municipal Board (JMB) wow pynkhooid yei jhep wa da lang chiboon bha ha u sarok khyndaw ka Iawthymme hadooh wym lait de ki kari wow lai, da mih leh i pynbaad na ka JHADC kawa pynlai ya kani ka yaaw wa i jhep toh kiwa mih ym du na kiwa chongdai tangwa kiwa da wan noh leh da kiwa na kylleiñ.
Heiyatoh wa ini, neiliang u Chairman ka Jowai Municipal Board, u Philanderwell Lyngdoh da ong u wa ini i noh roi yei jhep toh kawi na ka kjut kiwa chong chnong ka Jowai kiwa da chim kabu wow lai noh jhep ha iwon iwon i thaw wa lang i jhep kam ha kani ka Iawthymme wei ini da wanrah ko yei sma i tung wei kamjooh leh daw poi chei mih i kjut i chitom wei daw ktah ko leh ya umdih.
Da pynkynmoo u leh wa dang ini wa dep da em kiwa wan noh khlemakor yei jhep hadien ka Thomas Jones Synod College wa cha kiwi tawon ki bynta wa kynthup ya ka Dulong-College Road wei ini waroh toh nei wym em i kitkhlieh na i kam ki bru wa chong chnong.
Da pyntip u leh wa da yoh khubor wa em ki kari khian hadooh ki kari Pick-Up kiwa lai pynlang jhep na ki yung ki bru dep neitæ lai noh ki ha iwon iwon i thaw wa yoo biang ki.
Kamtæ da maham lada chem ya kini ki kari wa leh yeini lait noh ki kari Municipal, daw kem ki wei daw pynchitom ki katkam ka aiñ wei da e laad leh ya ki bru paidbah wow pyntip ki lada chem ki kam kini deiwa riñdur næ chondur wei daw e ya ki da ka khusnaam wei daw murieh leh yei pyrtuid ki hawa wan pyntip ki cha ka Jowai Municipal Board.
Puræ leh: Chadooh cha pyrdi sarok poi i jhep ha Jowai
Discussion about this post