U Alexei Zhuravlev uwa man kam u First Deputy ka State Duma Committee on Defence hapoh ka ri Russia kamjooh u heh ka Rodina Party wei man u leh kam u dkhot ka Parliament da maham u ya ka USA hadien wa kem ko ya kawi ka jhaad kit phniang ka Russia kawa tip kam ka Marinera kawa tip nachwa kam ka Bella 1 deiwa ong wa ini man ko kamwa hiar thma hapoh ka Russia.
Da ong u wa ka Russia toh u e jubab ko deiwa siat da ki Torpedo ya ki lieñ ka Coast Guard ka America kiwa emkti wow kem ya kani ka jhaad wei kani mon ko du kani donhi ka laad yow pynsangeh ya ka US kawa da leh katwa ngait hadien iwa lai hiar thma ko ya ka Venezuela.
Chooh chooh da ong u wa ini wa jia toh i kaam Piracy heiwa ka US da lai kem ko ya ka jhaad ka Russia deiwa pynemkaam da ki bru wa rah tiar yasiat wei toh wow jubab deiwa toh rukom hadooh wow pynemkaam da ki tiar Nuclear.
Da ong u leh wa katkam wa tip u, da em ki Submarine ka Russia deilang ki jhaad ka Navy hajan kani ka jhaad heipor wa chah kem ko wei i siat da ki Torpedo deiwa pynngam ya ki kattu katni ki lieñ ka Coast Guard ka USA toh iwa ye u leh neibhah kini ki lieñ da em ki da ki hajar Kilometer na u pood yong ki neibhah kattæ ka USA da leh ko katwa ngiat khlem tieñ hadien iwa jia ha Venezuela.
Ha iwi won i liang, ka Ministry of Transport ka Russia da ong ko wa kani ka jhaad Marinera toh kawa da yoh ya ka Temporary Permit wow krehkaam hapoh ka lama ka Russia ha ka 24 tarik u December 2025 katkam ki aiñ ka Russia kamjooh ki aiñ ka pyrthai (International Law) wei ini mut ko wa em hok ko wow lai ha ki duriaw wei ym em kiwon kiwon ki ri wa ye wow pynsangeh ka hawa em ko yei hok.
Tangwa neiliang ka USA da ong ko wa kani ka jhaad da tyngkheiñ ko ya ka Sanction ka USA wei da kem ya ka katkam ka hukum wa da e da ka yung bichaar (Federal Court) ka USA.
Discussion about this post