Ka satri ki seiñbhalang ka jylla hapoh ka lama CoMSO da pynsñiaw ko yei sñiawsih wow sñiaw na u montri rangbah ka jylla, u Conrad Sangma wa ka sorkar pyrdi ympu dep puræ bniah ko ya ka ILP Resolution wa da pdiang da ka Yung Dorbar Chna Aiñ ka jylla kawa du 2 sla donhi wei ini i pdiang da jan dap i chi snem kattu.
Ka CoMSO da ong ko wa ini i ieh khonswet ka sorkar pyrdi ya ka jylla wei man dieñchaiñdoh ka sorkar jylla kawa ap kat yeiwa klam ki heh BJP na Delhi toh iwa ymye pdiang de neibhah wa hajrong wa yaichah wei yooluti wa ka sorkar jylla daw yasaaid ko wow pynkrehkaam noh ya ka ILP tangwa yoo lakam wa da da emkaam wow hiar madan biang ki seiñ wow dawa ILP.
Chooh chooh da ong ko wa ymye ko wow pdiang yei leh u Lat ka jylla uwa hei sakhiat toh u ap u yei rai ki MLA Assembly wei i pynuiñ u ya ka MRSSA Amendment Bill 2020 cha ka sokrar jylla ryngkat ki yumut yong oo toh iwa ymye u pdiang. Da kylli ko wa hawa kamni ka jylla ym em ko mo ya ki bru wow pait ya ki tyrwa aiñ (Bill) neibhah wa da chah esikai pathan ki ha u Lat?
Da dawa ko na ka sorkar wow phah biang ya ka MRSSA Amendment Bill cha u Lat (lyngba ka Ordinance namo deiwa khut ya ka Dorbar wa kyrpang) wow soi u ya ka khlem pynslem de.
Khaddooh ka CoMSO da phah ko ya ki kyntien wa che kdar cha ka BJP wa ha Meghalaya ka CoMSO ym elaad ko la man katwa man wow pynkrehkaam ya ka CAA wei ki Bangladeshi waroh kiwa psiah tooh leh toh u mih noh ki napoh ka jylla.
Da pyntip ko leh wa ka CoMSO ha ka tayaw wow wan daw chong pyrkhat ko ya ki laad yakhih paidbah yei wym mano ka sorkar ya ka ILP wei wow pyrchah leh yei pynuiñ u Lat ya ka MRSSA Amendment Bill 2020.
