Neiliang ka seiñ EJNC hadien wa da dep ko wow phah ya i thoh cha u DC ka East Jaiñtia Hills District wow pynsñiaw yei pyrchah yei thmu wow pynman yaka Public Hearing yong ka Star Cement Meghalaya hajrong wow pynheh yaka paar moochuni wa em ha Brichyrnot, EJHD.
Ka EJNC ynne ka sngi won da phah cha u Chief Justice ka High Court ka Meghalaya u Justice Biswanath Somadder ko daka Letter Petition hapoh ka High Court of Meghalaya (Public Interest Litigation) Rules 2013 hajrong ka yurim wa i thmu pynman yaka Public Hearing man ko pyrchah yaka E.I.A Notification 2006.
Haka Petition da ong wa i thaw wa thmu wow tih moochuni daka Star Cement toh iwa du 200 Meter naka Eco Sensitive Zone wei hajan ka wah Lukha kawa em leh harood yong ka yaka Narpuh Wildlife Sanctuary.
Da pyntip leh wa la artylli ki Public Hearing da hap pyndam neidaw wa pyrchah ki paidbah tangwa katni da thmu wow pynman yaka Public Hearing ha pchem ka yung krehkaam u DC ka East Jaiñtia Hills kawa em palat 25 Km naka thaw wow tih ya u moochuni wei ini man ko pyrchah yaka Environment Impact Assessment Notification (EIA) 2006 wa pynmih daka Ministry of Forest & Environment ka sorkar India.
Da ong leh wa deiwa chimkabu yaka khlam COVID-19, ka sorkar da chah ko du 100 ngut donhi kiwa ye u chimbyna iwa man pyrchah yei thmu wow pynmaan yaka Public Hearing kawa toh u e laad wow pynsñiaw waroh ki paidbah.
Kamtæ da kyntu ya u Chief Justice wow chimkhia u ya kani ka kaam deiwa pynkylla ya ka cha ka PIL yow pyndam yei pynman yaka Public Hearing ha pchem u DC haka 21 tarik uni u bnai kamjooh yow phah pynman ha i thaw wa thmu wow tih ya u moochuni deiwa bood yaki kyndon ka EIA.