Ka JAC yong ka Ri-loom Jaiñtia kawa kynthup ya ki seiñ kam ka AJCVA, MPUF, JYF, JSU, HYC, HNPF, JSM wa kiwi kiwi da pyrchah joor ki ya i thmu ka sorkar Meghalaya wow e wai ya ka MeECL cha ki Company ki bru samen.
U Paila Kordor Lyngkot u wa man leh u Spokesperson ka JAC da ong u wa kammon hawa waroh ka pyrthai dang em ko hei maa wa hei eh wow yaleh thma ya u COVID-19. Katwa hapoh Meghalaya yong i won heithaw wa ka sorkar wow thooh laad thooh luti ko kammon wow yarap ya u kup chiliang u sem chiliang khamtam kam ha kini ki por, chim kabu pathan ko wow thooh laad kammon wow dai wow e wai ya ka MePDCL .
Da ong u leh wa lada ha ini i rukom pynyoo wa ka sorkar em ko i thmu wow tynyap yabor ya ki kup chiliang ki sem chiliang. Neibhah lada e wai ya ka MePDCL cha ki Company samen, i dooh nong toh i yong u paidbah. Ka sorkar iwa leh ko toh neibhah wa yoh nong ko se te dai ko. Lada kam kiwa chong chnong ym kyrngait de i, ym slem de ka ri wa ka jaitbru yong i daw dooh noh ko. Da toh i por kam kiwa em i kitkhlieh ya ka ri wa ka jaitbru wow ya tylli i chirup yow yaleh pyrchah ya ini i thmu kani ka sorkar.
Chooh chooh da booh u yei kylli ya ka sorkar wow jied ko wow yada ya ka ri waka jaitbru mo jied ko wow yohlaad u dai, u e yei emkaam ki paidbah cha ki Company mo? Lada ka sorkar ym pyndam ko wow e wai ya ka MePDCL cha ki Company samen, ka JAC Ri Loom Jaiñtia ym yohsa ko wow thooh laad da kawi won, lada toh wow yakhih leh hap wow tia chaphrang neibynta ka mynried ka mankawi ka ri wa ka jaitbru.
