Ka All Meghalaya Mid-day Meal Workers Union da maham ko wow pynman da ka yakhih neidaw wym bna ka sorkar yei kyrpaad wow pynku ya ka bai nong yong ki kawa da yoh hadooh katni du T. 1000 chi bnai, neibynta wow chet ja sngi ha ki skur.
Kiwa yahkhmat yong ka AMMWU, ka Bilin Kurbah da ong ko wa kiwa chet ja sngi ym yohsa ki wow mih cha sarok lada ka sorkar ym bna ko wow pynku yei su ya ki, da khana ko wa ka Union neipor chei por da thoh ko cha ka sorkar wow kyrpaad neibynta wow pynku noh ya ka bai mylla chet ja sngi na ka T. 1000.
Katkam i khana ka Bilin, kiwa chet ja sngi ha ki skur waroh da em ki kamwa 18,500 ngut wei kini toh kiwa em ha waroh kawi ka jylla, da ong ko wa kam kiwa mylla da yang bait ki wei man ki kiwa yai chah, tangwa hadooh kini ki sngi ka sorkar ym em pyrkhat ko iyi iyi yei jynjar yong ki.
U Kenneth Shadap uwa man uwi uwa da yakhun wow pynyoh yei hok yong kiwa chet ja sngi, da ong u wa najrong wa i su man i iwa khian, yoh ki leh wow kreh du 10 bnai ha ka chi snem, da ong u leh wa nadooh u snem 2018 da yaklam yei eh kiwa chet, wei wot ki sahep da pynsñiaw ki wa du T. 1000 chi bnai ym yahaap de ha ka juk wa katni, tangwa wot hawa ki sahep sorkar da e yumut ki cha ka sorkar wow pynku cha ka T. 3000 chi bnai, da pynuiñ noh deiwa ong wa da heh palat.
Neiliang ka seiñ da lai e dorkhat ki leh ynne ka sngi ha u Montri Rangbah yow pynkynmoo yei dawa pynku ya kani ka nong sngi wei wow su leh waroh 12 bnai chi snem ym toh du 10 bnai chi snem kamwa man katni. Wei wow pynku ya ka bhah ka sorkar jylla naka T. 100 cha ka T. 900.
