Kiwa sikai skur SSA hapoh ka lama Meghalaya SSA School Association (MSSASA) da maham ki wow pynman da ka yakhih paidbah nadooh ka 1 Naichiphaw lada ka sorkar ymye ko wow jubab næ su pyndep noh ya kiwa sikai hapoh ka 30 tarik uni u bnai.
Kini kiwa sikai da pynman ki leh ya ka yakhih ha Madan Malki, Shillong heiwa da chim ki ya ka rai wow sangeh sikai 2 sngi ha ka 1 wa 2 tarik u bnai wow wan lada ka sorkar dang suki ko yei dawa yong ki iwa man katkam ka Right To Education.
U Aristotle Rymbai uwa man u President ka MSSASA hawa klam ha ka yalang da ong u wa kiwa sikai da dawa ki na ka sorkar jylla ya i hok yong ki neibhah wa ka sorkar da kular ko wow pynbiang lut ya i rukom su cha ki katkam wa toh u yoh ki.
Da ong u wa nadooh u 2013 kiwa sikai da phah ki boon tylli ki dorkhat cha ka sorkar tangwa ym em u chimkhia ko yeini wei u montri ka chnat puræ puthi ka jylla, u Lahkmen Rymbui leh da pyntikna u wa dadep pynbiang lut liang wanang heipor wa yachem u wa kiwa sikai.
U Aristotle da ong u leh wa ka sorkar MDA da thok donhi ko ya kiwa sikai wow man ki kam ki broo yong ka wow ky’i bait yeiwa ong ka sorkar, heiwa da ong u wa sa katwon u chah kiwa sikai neibhah la le snem chiteiñ khlem kiwon kiwon ki dak tangwa du i raw i dooh ki 12,000 ngut kiwa sikai.
