Ka Batbitbha Bareh kawa na chnong Dkhiah, East Jaiñtia Hills da pyndep ko ya ka Exam wa pynman da ka All India Football Federation (AIFF) wei da yoh ko wow man kam ka National Referee (W-Level 5).
Kani ka Exam kynthup ko ya ka Fitness, Theory, Practical wa Viva kiwa da pynman ha Kolkata wa ha Gwalior ini wa dep.
Da ini ka Batbitbha da man ko ka nyngkong dooh ka National Referee wa da mih napoh East Jaiñtia Hills ym du kam ka kynthai.
Ini mut wa da ye ko wow man Referee ha ki yalehke wa pynman da ka AIFF ha ki kyrdan Senior wa Junior.
Hawa yaklam wa u Wyrta da khana ko wa heipor wa dang khynroo da jooh yalehbol ko wei da yoh ko leh wow mihkhmat ya ka Meghalaya ha ki kyrdan yalehke Senior wa Junior wei kam ka Referee da sdang ko ha u snem 2013 wei da sangeh ko chibet chipor wei da sdang biang ko hadien wa kut ka Lockdown ha u snem 2021.
Hanla kattæ leh ym pu em ieh ko wow yalehbol heiwa ynnin u snem dang chimbynta ko ha ka Women’s League wa pynman da ka East Jaiñtia Hills District Football deiwa mihkhmat ya ka Dkhiah West heiwa da poi ki leh cha ka Final.
Ka Batbitbha da khana ko wa ha yung ki kiwa em 11 ngut chi payu toh du kiwa ka’it ya ki kaam Sports nadooh ki chynrang wa kynthai heiwa da em uwa yaleh Karate, Athletics wei ka deilang wa ki diah kynthai da jooh lai mihkhmat ki hei wow yaleh Kabaddi.
Da khana ko leh yei yalehbol da sdang ko nadooh i por wa em ko 16 snem wei ka bei wa u pa ko leh heipor wa dang khynroo ki toh kiwa yalehbol.
Heiyatoh wa i puræ puthi yong ka da pyntip ko wa da pyndep lut ko ha East Jaiñtia Hills.
Discussion about this post