15 49.0138 8.38624 1 0 4000 1 https://wyrta.com 300 0
Advertisement ad1

Man ka le bnai u lai pait ki montri ka MDA ya ki 11 District

0 Comments

Shillong: U Montri Rangbah ka jylla, u Conrad K Sangma da ong u wa ka sorkar da rai ko wa waroh ki montri sorkar daw lai pait ki ya ki 11 tylli ki District ka jylla man ka le bnai wow pyntikna yei lai bait ki laad yarap næ ki kaam pynroi. U Conrad da ong u yeini hawa jubab yei yania hajrong ka mang tyngka wa da wanrah u hapoh ka yung dorbar.

U Montri Rangbah da ong u wa ki montri daw pynman ki leh ya i sñiaw paidbah wow ap yeiwa emkaam ki kamjooh leh ya i eh ni khoo ki padibah ha waroh ki District.

U Conrad da ong u wa ki montri haap ki leh wow e ya ka bui (Report) cha ka sorkar wow pyntikna wa i pynkrehkaam ya kiwon kiwon ki scheme man ki kiwa lai bait.

Heiyatoh wa i khang tih mooyong, u Conrad da ong u wa myntu i janmiet daw lai ki cha nongbah Delhi deilang wa ki kattu katni ngut ki montri sorkar wow yachem ya u Montri Rangbahdooh ka ri, u Narendra Modi wa ya u Montri wa ya ka kaam mooyong, u Piyush Goyal, wei da pynrap leh wa iwa mih na ini i yachem daw wanrah ha ka dorbar wow pynsñiaw ya waroh ki dkhot ka yung dorbar.

Hawa jubab chooh chooh ya i sñiaw ki dkhot kiwa yachim bynta ha ka yania ya ka mang tyngka, u Conrad da ong u wa ka sorkar da chimkhia bha ko ya i khynnia ka sor Shillong, heiwa da pyntip u leh wa ka sorkar lyngba ka Task Force wa da khlieh da u montri ka tnat PWD (Roads), u Prestone Tynsong da jied wa 18 tylli ki thaw ha sor kiwa ye wow pyllait na i khynnia wei ka tnat transport dang sorjamin ko ya kini ki thaw.

U Conrad da pyntip u leh wa daw chna noh ya ki luti lai kjat na suiñ wei wa daw thooh laad wow pyndep noh ya ka Mawlai Bypass ka wow yarap pynduna yei khynnia ya i sahkut ki kari.

Heijooh i por da ong u wa ka mang tyngka wa da wanrah ym kynthup ya i pynlut neibynta ka National Games 2022, tangwa man ko neibynta iwa emkaam ka jylla waroh chi snem.

U Conrad da ong u leh wa ka sorkar sñiawkhia ko yei roi i pynemkaam Drugs hapoh ka jylla wei ka sorkar daw pynman ko ya i pynsñiawthooh paidbah wow lait na i dih Drugs, da pyntip u wa ka sorkar da booh ko ar tylli ki thaw ya syllok ya kiwa da ngat hei dih drugs, ka wi toh ka New Hope Centre wa ka Kripa Foundation.

Advertisement ad1
Advertisement ad1

0 Comments

Leave a Reply