Ka sorkar jylla ynne ka sngi da e poisa pyn-eh-daw ko mar Rs.10,000 cha ki 403 ngut kiwa chongdai dukan madan ha Ïewduh lyngba ka CM Urban Livelihood Grant, kawa man chibynta wow kyrchaan ya kiwa chong yaaw yow pynheh ya ka kamai kajih yong ki.
Ya kani ka song pisa wa da e lyngba ka Cheque wa da saam da u Montri Rangbah ka jylla, u Conrad K Sangma ha ka yalang kawa da pynman ha thaw yieñ kari ha Ïewmawlong, heiwa da emlang leh ki Symbood Montri Rangbah, u Prestone Tynsong wa u Sniawbhalang Dhar, ka Montri sorkar, ka Ampareen Lyngdoh, u Sanbor Shullai, MLA neitæ ki heh sorkar ka chnat Urban Affairs wa SMB deilang u Syiem wa kiwa khroo ka Hima Mylliem.
Hachwa ini, u Montri Rangbah deilang ki Montri sorkar da lai psiah ki leh cha ka Ïewduh yow bichaar bniah yei kreh pynkylla dur ya kani ka yaaw kawa da yarap poisa da ka DoNER Ministry kawa da jan poi Rs. 50 klur.
Hawa klam ha kani ka yalang, u Conrad da kynmoo u yei por wa dang khynnah wa jooh lai thied tiar u na Ïewduh, wei da ong u wa kani ka yaaw hadooh katni dang neh ko kamjooh bait, kamtæ da emkaam u pynbha pynthymme noh ka.
Da ong u wa ka jylla daw kynjoh ko cha ka 10 Billion Dollar ha ka khayi pateiñ, deiwa ong leh wa i kreh yow chna ya ki sarok heh wa kiwi ki kaam waheh waheh ym em yumut i lada khlem da kyntu ya ki paidbah wa im mylla sngi wa kynthup nadooh kiwa chongdai dukan madan, deiwa pynrap wa kani toh ka rukom pyrkhat ka sorkar kamtæ da rai wow wan pait ya ka Ïewduh.
Chooh chooh da ong u wa deiwa chong hi-eh ha Secretariat, ka sorkar ym ye ko wow rai, kamtæ da sñiaw u wa toh u maad ya iyi wa ki paidbah maad ki man-ka-sngi ha Ïewduh, deiwa ong u leh wa sñiawsuk u yoo ya ka Ïewduh ini wadep ha u Naisan heipor wa joor u slap neibhah da sñiawthooh bha iyi wa ki paidbah maad ki.
Discussion about this post