Du hadien kattu katni kynta wa ka Sheikh Hasina hiar chuki wei ieh ko yei kaam kam ka Prime Minister ka Bangladesh deiwa yut cha India, neiliang u President ka Bangladesh, u Mohammed Shahabuddin da pynmih hukum u wow pynlait patok noh ya kawa yahkhmat ka liang pyrchah kawa jooh man leh kam ka Prime Minister warim, ka Khaleda Zia.
I rai wow pynlait patok ya ka Khaleda Zia da chim hadien i yaklam wa ka liang pyrchah heiwa u President Shahabuddin deiwa ya mynjur lang ka Bangladesh Nationalist Party (BNP) Chairperson da leh u yeini khlem da pynslem.
Ha kani ka yalang da em leh u heh ki chipai, u Waker-Uz-Zaman wa kiwi de ki heh na ka Navy wa Air Force kamjooh kiwi de ki heh Party wa em ha ka liang pyrchah nadooh ka BNP waka Jamaat-e-Islami.
Ka Khaleda Zia (78 snem) toh kawa khlan bha u yakhun pyrchah ya ka Sheikh Hasina wei man ko leh kawa yahkhmat ka liang pyrchah, ka Bangladesh Nationalist Party.
Da man ko leh kawa nyngkong dooh ka kynthai wow man Prime Minister ha Bangladesh ha u snem 1991. Da psiah ko cha ki kaam Politics hadien wa chah pynyap u kurim ko, u Ziaur Rahman, uwa jooh man kam u President ka Bangladesh nadooh u 1977 hadooh u 1981 uwa sdang leh ya ka Bangladesh Nationalist Party ha u 1978.
Ka Khaleda Zia toh kawa ym em da chait bha wei da hap lai ko cha baar ri yow chah sumaar.
Ha u snem 2018 da chah kem ko hadien wa chah pynngat ko ha ki kaam baam tooh heiwa ka da ong ko ini toh wa leh da kiwa em hei bor wow kset ka.
Da jooh man ko kam ka Prime Minister nadooh u 2001 hadooh 2006.
Hadien wa kut ka samoi ka sorkar ko ha u snem 2006, ka Election wa toh u pynman ha u bnai nyngkong u 2007 da hap pynslem ka neidaw wa em ka yakhih hadooh wa chimkti da ki chipai wow pynlai ya ka sorkar wa chipor.
Ha kini ki por, kani ka sorkar wa chipor da pynngat ko ya ka Zia deilang wa ar ngut ki khon ko ha ki kaam baam tooh heiwa heipor ko nadooh u 2001, ka Bangladesh da bna naam ko kam kawa baam tangka dooh hapoh pyrthai.
Discussion about this post