Shillong: U MDC wa jop kam u kyrtong samen na Mawlai Constituency, u Teiborlang Pathaw hadien wa jop Election da lai psiah u wut wut kam u dkhot wa pura ka United Democratic Party (UDP) ynne ka janmiet.
Na ini i lai psiah Teibor, ka UDP kawa jop du 6 ngut ki MDC ha KHADC da ku cha ka 7 ngut wei deilang waka NPP ye ko wow chna Executive Committee wa thymme deilang wa kiwi ki Party ri-loom kamwa da leh ha ka sorkar Meghalaya Democratic Alliance (MDA) deiwa kyntait ya ka Congress.
Hawa yaklam wa u Teiborlang Pathaw da pyntip u wa ka UDP da tyrwa Ticket ko ya oo wow yakhun Election nadooh chwa ka Election tangwa ym em pdiang u ha itu i por.
“Man ko kawa sakhiat wa nga da psiah O kam u MDC wa pura ka UDP. Chwa ka Election leh neiliang ka Party ka da wan tyrwa Ticket ko ya nga wow yakhun Election MDC, tangwa ha itu i por nga ym em pdiang O,” da ong u.
U Teibor da ong u wa i daw wa psiah u cha ka UDP toh wow pynman kaam ya i thmu waka yurim neibynta ki paidbah.
“Nga thrang O wow pynman kaam ya i thmu neibynta ki paidbah, ka UDP toh ka seiñ kawa emlang waka sorkar jylla wei ye ko wow chna ya ka Executive Committee ha KHADC, nga sñiaw O wa i em ha kani ka Party daw ye O wow leh ya ki kaam wa bha,” ong u Teibor.
Discussion about this post