U Prime Minister, Narendra Modi mar ya liwan u chapoh ka ri hadien wa lai chimbynta ha ka G20 Summit waka COP26, daw pynman u ya ka yalang wa ki District wa duna dooh kiwa em kiwa yoh tika yada COVID-19.
Yeini daw pynman ha ka 03-11-21 heipor 12:00 waje pyrdi sngi lyngba ka Video Conferencing.
Ya kani ka yalang Review Meeting daw kynthup ko leh ya kitu ki District wa em hapoh 50% kiwa da yoh yei sien wa nyngkong i tika kamjooh kiwa duna kiwa wan chim yei sien wa ar i tika.
U Prime Minister daw yaklam u leh wa ki District Magistrate ha palat 40 tylli ki District kiwa em ha Jharkhand, Manipur, Nagaland, Arunachal Pradesh, Maharashtra, Meghalaya wa kiwi de ki jylla wa duna kiwa yow tika. Ki Montri Rangbah ka jylla leh daw embynta lang ki ha kani ka Review Meeting.
Ki District hapoh Meghalaya kiwa em hapoh 50% kiwa da yoh tika chisien hadooh ynnin ka sngi toh ka West Khasi Hills 39.8%, South Garo Hills 42.6%, West Jaiñtia Hills 45.6%, East Garo Hills 48.5%, North Garo Hills 49.4% wa ha South West Khasi Hills 49.6%.