U General Secretary ka People’s Democratic Front (PDF) uwa man leh u kyrtong wow yakhun ya ka Election MLA 2023 na Mawphlang, u Auspicious Lyngdoh Mawphlang da beiñ u ya ki bru wa kiwa mihkhmat paidbah kiwa leh ya ki kaam wyrai wei wow yarap ya ki paidbah deiwa thaad won ya kiwa dooh wa duk.
Hawa klam ha ka yalang paidbah yong ka Party ha Mawphlang, uwa yahkhmat ka PDF da ong wa hawa lai e yarap ya kiwa dooh, hap wow khut wa ki dkhot ki laad pathai khubor wow riñ dur hadooh ya u sumurit wei da phah niam rong da iwa phooh wow tipmit wa ki da yarap ya katæ ka manyung, kamtæ da ong wa lada ini toh i leh wyrai næ wow pynyoorong yei yarap ya ki paidbah.
Da ong wa ini i toh i dai sarom neibhah katu ka manyung da hap ko wow chah kdawkti wei wow chah klam wa ya katai ka yung da pynchna da utæ wa kitæ, wei ini pynyoo wa i yatip wei i sñiawlang da wiar ko ha kani ka juk wa katni.
Ha iwi won i liang u Auspicious da ong u wa kiwa boon ngut kiwa mihkhmat ha kini ki sngi da bakla ki neibhah mar ya man kam kiwa mihkhmat da thied ya ki kari kiwa chongdor da ki phaw lak, wei sap leh da ki Suit kiwa T. 60-70 hajar hadooh wa uwa dooh wow kdung wow khublei kti leh ym nood de ya u MLA. Da ong u wa ileh wa kiwa mihkhmat ym ye ki wow im kam ki paidbah hawa ki toh kiwa mihkhmat paidbah.
