I kynmoo burom yaka 34th National Road Safety Week 2023 ha West Jaiñtia Hills District da ka chnat Transport chirup i krehlang waka yung krehkaam u Deputy Commissioner, ka yung krehkaam u Superintendent of Police, ka yung krehkaam u District Medical and Health Officer waka chnat Public Work Department Jowai, dapoi ko cha wakut ynne ka sngi deiwa pynman i sylli ya ki kari wa lai wa wan hakhmat ka yung krehkaam u District Transport Officer, Jowai kamjooh leh i saam kot lakdop cha ki paidbah wa da thoh ya ki kyndon wa emkaam u bood ryntih ki hawa yah kari khnang yow lait nei sahkut kari, i tyngkhooh kari wei yow lait na iwon iwon i jia wa sñiawsih.
Neiliang u DTO, u E. Lyngdoh da pyntip u wa ya kani ka Road Safety Week da sdang ki ka waroh chi tayaaw nadooh ka 27 tarik uni u bnai deiwa pynman i pynsñiawthooh paidbah ha Ummulong, Wahiajer, ha Phramer, ha Amlarem, ha Iawmusiang Jowai wa ynne ka sngi mar pyrchah ka yung krehkaam u yow pynkynmoo ya ki paidbah kammon u yada ya ki hi hawa yah kari, yah ar chaka deiwa kiar nei dih pynmuaid, i klam Phone wei wow deiñ Seatbelt, deiñ Helmet.
Hawa yaklam won hajrong i pynkrehkaam ya ki kyndon pynrkhiñ neibynta ki kari mator, pyntip u wa neiliang ka yung krehkaam yong oo neipor cheipor jooh pynman ki yei sylli ya ki kot ki sla kari kamjooh ya kiwa tyngkheiñ ya ki kyndon ka aiñ Motor Vehicle Act.
Tangwa katni deiwa im won ha ka juk Mobile, da ong u wa rap duna i yoh kem ya ki kari wym biang kot namo kiwa tyngkheiñ aiñ neibhah wa du hadien kattu katni minit wa pynman yei sylli kot kari, para wa yah kari da ya Phone pateiñ ki yow khana lang, kamtæ kitu hi ki wym biang kot kiwa tyngkheiñ aiñ, ym lai de ki nei thaw wa pynman yei sylli kari.
Heijooh i por leh ong u chisien hi wa da pynman yei sylli kari, ha Jowai wym jooh sahkut kari neidaw wa da duna ki kari wa uiñ wa lai.
