Ka Montri sorkar kawa man leh kam ka Chairperson ka Committee wa pait ya ka Reservation Roster System waka Reservation Policy, ka Ampareen Lyngdoh ynne da pyntip ko wa daw kynjoh ktien ko ya kiwi ki dkhot Committee wei kamjooh wa kiwi ki seiñ saiñ pythai kammon u lai ki chakhmat.
Da pynyknmoo ko leh wa ini wadep ka sorkar da pynmih ko ya ka Office Memorandum wa dang thymme wei ynne toh da kut i e por ya ki seiñ saiñ pyrthai wow wan e ki yeiwa sñiaw ki cha ka lane cha u Montri Rangbah lane cha u Chief Secretary.
Da ong ko wa hadien wa pynlang lang ya waroh iwa da tyrwa kamjooh lada em i paan pynche yow bichaar chwa ki chwa wow khut ya ka Expert Committee neibhah ka sorkar emkaam ko wow sñiawthooh iyi wa da kylli yow tip ka sorkar kammon wow pynbait ya ka Reservation Policy.
Ka Montri da ong ko wa ini daw chimpor neibhah hap wow tip thij iyi wym sñiawthooh yow ye u wanrah ya ki bru wa chemphang na ki waphær waphær ki jait kaam.
Kam wow pynkynmoo wa ka sorkar da dep ko leh wow thung ya ka Search Committee yow jied ya ki dkhot ka Expert Committee ki wow pait biang deiwi ya ka State Reservation Policy, 1972.
Puræ leh: Pynbna ka sorkar ya ki dkhot ka Search Committee ki wow thooh ya ki dkhot ka Expert Committee
