Haka yalehke Final ka Zone-1 ynne ka sngi ha Nongpoh hapyrdi ka Shillong Cricket Association-A waka Ri-Bhoi District Cricket Association haka Inter-District U-23 Men’s Cricket Tournament wa pynman daka Meghalaya Cricket Association da haap hadooh 28 tylli ki Wicket.
Hawa kut ka yalehke ka sngi nyngkong, ka SCA-A da tam ko da 132 Run, deiwa dooh 8 Wicket haka Innings wa ar.
Haka sngi wa man ka yong kiwa kawang bol, ka SCA-A da jop ko yaka kylla khlem wei da jied ko wow Bat nyngkong heiwa da kamai ko 107 na ki 39.4 Over. U Abhishek Kumar da kamai boon dooh deiwa yoh 38 na 31 bol, katwa u Swastik Chettri da yoh u 25 na 52 bol. U Ram Gurung da kawang u 20 Over deiwa e du 25 Run deiwa yoh 4 Wicket. U Bharat Gurung won da yoh u 2/22.
Ka Ri-Bhoi haka Innings wa nyngkong da neh ko du 24.4 Over deiwa ye u kamai du 64 Run. U Bharat da kamai u chiteiñ na ki Run (31 na 59 bol), katwa u Kumar toh uwa lehbha dooh uwa yoh 6/39. U Lokesh Turaha won da yoh u 3/7.
Ini da e ko yaka SCA-A wow tam da 43 Run haka Innings wa nyngkong tangwa ka Ri-Bhoi da pyndik biang ko yaka SCA-A haka Innings wa ar. Hadooh wa kut ka yalehke, ka SCA-A da yoh ko 89/8. U Ram wa u Bharat sa chisien da lehbha ki da ka bol yaka Ri-Bhoi deiwa yoh 4/41 wa 2/30 samen.
