Ka Ri-Bhoi waka South Garo Hills da jop ki ha ki yalehke yong ki haka Inter-District U-23 Men’s Cricket Tournament ynne ka sngi wa pynman daka the Meghalaya Cricket Association.
Ka Ri-Bhoi da jop ko yaka East Jaintia Hills da chi Innings wa 69 Run haka Zone 1 ha Nongpoh, katwa ka South Garo Hills da jop ko da 8 Wicket yaka South West Khasi Hills ha Mendipathar haka Zone 2.
Deiwa pteiñ yaka sngi wa ar da 36/2 haka Innings wa ar, ka EJH da emkaam ko 145 Run yow phah Bat biang yaka Ri-Bhoi. Hawa kut, ka EJH da haap lut ki Wicket ko da 112 Run, heiwa da kamai boon Run dooh da u Passang Sherpa (24) wa u Bharat Subba (22). Na kiwa kawang bol, kiwa lehbha dooh toh u Ram Gurung (3/16) wa u Vicky Kumar (3/22). U Gurung ha kani ka yalehke da yoh u waroh 9/41 hadien wa yoh u 6/25 haka Innings wa nyngkong.
Haka yalehke ha Mendipathar, hawa kut ka sngi wa nyngkong, ka SGH da tam ko da 34 Run hadien wa dep waroh arliang wow Bat haka Innings wa nyngkong. Haka Innings wa ar, ka SWKH da ye ko wow kamai du 84 Run heiwa ha iwi i por da yoh ko 49/9 chwa wow wan u Sardonik Lyngdoh (13) wa u Birat Sangma (15*) kiwa da kamai lang 35 Run neibynta ka Wicket wa khaddooh.
Kamtæ ka South Garo Hills da emkaam ko 51 Run yow jop iwa da ye ki wow leh deiwa dooh ar tylli ki Wicket. U Arien Bonchang da yoh boon Run dooh u deiwa kamai 23 Run.
