Ka spah Run wa ki ar Wicket naka Neha Hajong da pynjop ko ya ka Shillong Cricket Association da 73 Run ya ka South West Khasi Hills haka U-23 Women’s Inter District Cricket Tournament ynne ha Nongstoin wa pynman da ka MCA.
Ka SCA da jop ko ya ka kylla khlem wei da jied ko wow Bat nyngkong ha kani ka yalehke ka Group B ha ka Zone 1.
Ka Hajong kawa yoh leh yei naam Player of the Match da kamai ko 119 Run na ki 118 bol wa kynthup ya 14 tylli kiwa da poi cha u pood yow pynyoh ya ka SCA 211/6 na ki 35 Over. Ka Darisha Wahlang da yoh ko 3/53 ya ka SWKH.
Ka SWKH hawa e yei jubab da yei ki wow Bat waroh ki 35 Over tangwa da kamai ki 138/9. Ka Indariakor K Wanniang da kamai boon dooh ko da 22 Run. Ka Reshma Thapa da yoh ko 3/15, ka Hajong 2/12 waka Mansi Anand 2/33 da ka bol.
Ha ka 28 tarik ha ka Group A ka Zone 1, ka Ri-Bhoi daw yachem ko waka East Khasi Hills. Katwa ha ka Zone 2, ka North Garo Hills daw yachem ko waka East Garo Hills.
