Ha ka yalehke Freestyle Wrestling ka 5th Meghalaya Games, da mih kawi ka parom wow e mynsien ya kiwi heiwa ka Ringchi K Sangma kawa na Upper Wadanang, West Garo Hills District kawa 19 snem kawa lai puræ ha Govt. Higher Secondary School hei sien wa nyngkong wa pyrchang ko da ye ko wow yoh takma.
Ka Ringchi da psiah ko cha ka Wrestling Association of WGH, kawa man ka seiñ kawa dang thymme kawa em 23 ngut kiwa yalehke wei da sdang ya ka dang chi bnai donhi. Chwa wow chimbynta ko ha kani ka Meghalaya Games, da lai chah hikai ko haka Wrestling Association of Meghalaya du 6 sngi donhi.
Ha ka yakhun wa nyngkong yong ka ynnin, ka Ringchi da yoh ko yei jop heiwa da psiah syndon ko cha ka Final kawa daw pynman myntu ka sngi ha ka thaw pynman Wrestling wa em ha St. Mary’s Higher Secondary School. Ka Ringchi da tikna wow yoh ko yaka Takma Rupa lada rem ko haka Final.
Ka Ringchi da man ko leh kawa nyngkong dooh na Garo Hills wa yaleh Wrestling wow yoh takma haka Meghalaya Games. Ka Wrestling ha kani ka kynti da man ko leh kawi na ki 23 tylli ki jait yalehke neibhah wym em Wrestling State Association ha Meghalaya chwa u September 2022.
Ka 5th Meghalaya Games 2024 da man ko leh ka sien wa nyngkong wa da wanrah yaka Wrestling kawa man leh kam ka Olympic Sport, wei da ini da yooluti wa kiwi leh dow yoh mynsien ki wow chimbynta ha kiwa boon ki yalehke.
Discussion about this post