Ka West Jaiñtia Hills District hadien wa da kut ki yakob yong ki yalehke tynre namo ki Traditional Games wa da pynman ha ki ar sngi yong ka 17 wa ka 18 tarik ka Meghalaya Games 2024 kiwa kynthup yaka Rah Mookhrah (Jaintia Traditional Game), ka Wapong Sika (Garo Traditional Games) waka Dat Mooniaw, da pynbna wa man ko kawi na ki District wa yoh u rah yei naam jop haka Rah Mookhrah Team Competition, katwa ya ka Team Event Runner-Up won da rah da ka East Khasi Hills.
Ha ka yakob Rah Mookhrah yong samen, ka West Jaiñtia Hills da yoh ko u rah yaka Takma Ksiar waka Takma Rupa lyngba u Da-O Hi Dhar uwa da ye u rah ya ki Mookhrah kiwa em i khia 67.35 Kg, 71.45 Kg, 82.01 Kg, 101 Kg wa 107.6 Kg hei jngai wa 100 Meter hapoh i por 2.01 minit neitæ bood ryngkhi won u Me U Ru Suna uwa da ye u rah ya ki Mookhrah kiwa em i khia 67.35 Kg, 71.45 Kg, 82.01 Kg, 101 Kg wa 107.6 Kg hei jngai wa 100 Meter hapoh i por 2.06 minit.
Ya ka Takma Tama da yoh rah da u Vincent Bareh yong ka East Khasi Hills wei ki Mookhrah kiwa da rah u toh kiwa em i khia 67.35 Kg, 71.45 Kg, 82.01 Kg wa 101 Kg wei da ye u wow pyndep yei rah yong oo hapoh i por 2.10 minit hei jngai wa 100 Meter.
Ha ka Wapong Sika won, u Pangrak R. Marak na West Garo Hills da yoh u yaka Takma Ksiar deiwa bood ryngkhi won u Lambai Challam yow yoh Takma Rupa, katwa u Wanlambhamiki Passah da yoh u yaka Takma Tama kiwa waroh ar na West Jaiñtia Hills.
Ha ka Dat Mooniaw won heiliang ki kynthai, ka East Khasi Hills da yoh ko yaka Takma Ksiar, ka West Garo Hills da yoh ko yaka Takma Rupa katwa ka West Jaiñtia Hills da yoh ko yaka Takma Tama.
Heiliang won ki chynrang, ka East Khasi Hills da yoh Takma Ksiar ko deiwa bood ryngkhi won ka West Garo Hills kawa yoh Takma Rupa katwa yaka Takma Tama da yoh ka West Jaintia Hills.
Discussion about this post