May 13, 2023
Ki yalehke ka Meghalaya State League 2023 da pteiñ biang ynne ka sngi deiwa pynman 5 tylli ki yalehke ha ki 4 tylli ki madan.
Ha ka Group B ha Jowai da pynman ar tylli ki yalehke wa mar kawi ha ka Group A ha Shillong, Group C ha Mawkyrwat waka Group D ha Tura.
Ha Jowai, u Slander Nongtdu da yoh u wow thap kool pyn ha ka minit wa 6 wei da pynbood da u Vicky Dkhar ha ka minit wa 28 yow pynjop ya ka Rymbai Iawpynsin SC da 2-0 pyrchah ya ka Youth Club Pdengkarong ha Kiang Nangbah Stadium.
Da pynbood won da ka yalehke hapyrdi ka Ladthadlaboh SC waka Sein Pynbhalang SC heiwa da jop ka Ladthadlaboh da 5-0.
Ha Shillong won, ka Mawlai SC da jop ko da 5-1 yaka Jyntru deiwa thap u Donlad Diengdoh (20′, 44′, 72′) yow yoh Hat-Trick.
Kiwi de kiwa thap ya ka Mawlai toh u Sanjini Dkhar (28′) wa u Remark Kharmalki (78′). Ya ka Jyntru da thap da u Emanbhah Marbaniang lyngba ka Penalty neidaw wa Handball uwa yalehke ka Mawlai.
Ha Mawkyrwat won, ka Mawten SC da jop ko ya ka Pyndengrei SC da 2-1 katwa ha Tura won ka yalehke hapyrdi ka Chipakkore FC waka Warima Youth Club da kut ko da 1-1.
Ha ka 15 tarik daw pynman soo tylli ki yalehke kiwa man kamni ha wah:
Group A, Shillong- Umrit Vs Seng Samla Laitryngew, 3 PM
Group B, Jowai- Mulait United Vs Youth Club Pdengkarong, 2:30 PM
Group C, Mawkyrwat- Seven United Vs Lumdiengngan, 3 PM
Group D, Tura- Selsella Sports Association vs Wasa FC, 3 PM
