Ka Meghalaya hadien wa rem ko le sien, da pynkut ko yei lai e reiñ ha ka Men’s U-25 State A Trophy deiwa jop da 41 Run ya ka Mizoram ha Guwahati ynne ka sngi deiwa leh bha u Roberth Sangma, Adarsh Joshi wa Arien B Sangma (tidiang cha timun hei dur).
Ka Meghalaya da jop ko ya ka kylla khlem heiwa da jied ko wow Bat nyngkong heiwa da kamai da 222/10 na ki 49.4 Overs. U Arien (53 na 55 bol, 10 tylli ki 4 Run) wa u Roberth (52 na 73 bol, wa 8 tylli ki 4 Run) da yah ki nakhmat.
U Arien da sdang u deiwa yoh lok wa u Biprodeep Dasgupta, uwa da yoh 18 na ka 72 Run wa da kamai lang neibynta ka Wicket wa nyngkong. U Ibitlang Thabah (14) leh da yarap lang u chwa wow wan kiwa Bat cha tre kitæ u Abhishek Kumar (25) wa u Joshi (25) kiwa da yoh 3 tylli ki 6 Run.
Ka Mizoram da sdang ko deiwa skem deiwa yoh 77 Run neibynta ka Wicket nyngkong chwa wow pynkut u Joshi yeini uwa da yoh waroh 5/42 na ki 10 Over. U Dasgupta da yoh u 2/26, wa mar chi Wicket ya u Mukesh Kumar Ray (1/25) wa u Agreas Chamcham Sangma (1/38).
Hadien 6 tylli ki yalehke, ka Meghalaya da jop ko le sien wei da rem leh le sien.
