Ka Meghalaya da rem ko da 7 Wicket ha ka Assam ha ka yalehke ka Men’s U-25 State A Trophy ha Guwahati ynne ka sngi.
Deiwa Bat nyngkong hadien wa jop ya ka kylla khlem, ka Meghalaya da ye ko wow kamai 140/10 na ki 42.5 Over, iwa ka Assam da ye ko wow kdong suk ha ki 30 Over deiwa dooh du 3 tylli ki Wicket.
U Arien B Sangma da kamai u 10 Run donhi nakhmat. U Kush Agarwal (26) wa u Roshan Warbah (12) da kamai ki 38 Run neibynta ka Wicket wa le, u Joydeepan Deb (24) wa u Mukesh Kumar Ray (12) da kamai lang ki 36 Run tangwa ini ym em u ye i wow pynku yei kamai Run ka Meghalaya yow ye u khyrwit chwa wow kut.
U Agreas Chamcham Sangma (10) wa u Abhishek Kumar (13 not out) da kamai lang ki 25 Run chwa wow kut yow pynpoi ya ka Meghalaya cha 140 Run i wym ye kiwa kawang bol wow yada.
Kiwa yalehke ka Assam da kamai suk ki yow jop heiwa ya ki Wicket da yoh wow pynhaap da u Kumar (2/34) wa u Agreas (1/44). Ka Assam kattu da jop ko ya waroh kiwa yalehke yong ka wei da man ki leh kiwa boon point dooh hapoh ka Group yong.
Ka Meghalaya kattu u yachem ko waka Arunachal Pradesh mynstep. Ka Arunachal da dep ko wow jop 3 sien na soo tylli ki yalehke yong ka.
