Ka Meghalaya da rem ko da 58 Run deiwa kheiñ da ka VJD Method pyrchah ya ka Arunachal Pradesh ynne ka sngi ha ka Men’s U-25 State A Trophy ha Guwahati heiwa ha ka yalehke wa ynnin ka sngi da rem ha ka Assam.
Ka Arunachal da jop ko ya ka kylla khlem wei da jied ko wow Bat nyngkong heiwa da kamai 199/9 na ki 50 Over. Waroh san ngut kiwa kawang bol wa pynemkaam ka Meghalaya da yoh ki wow pynhaap Wicket wa kynthup ya u Lokesh Turaha (3/43), u Abhishek Kumar (3/44), u Agreas Chamcham Sangma (1/25) wa u Bibek Poudel (1/32).
Ha kani ka yalehke da em i thut hei yalehke neidaw wa jhieh ka madan kamtæ da pynkylla ya ka thong cha 189, tangwa ka Meghalaya da ye ko wow kamai du 130 Run deiwa dooh lut ki Wicket.
Na kiwa Bat ka Meghalaya da em kiwa da ye wow sdang u kamai tangwa ym ye ki wow kamai boon. U Kush Agarwal (23), u Agreas (22) wa u Abhishek Gupta (22) katwa u Kumar wa u Nishanta Chakravarty da yoh ki mar 15 Run.
Kiwa kamai lang ya ka Meghalaya wa rap boon toh ka 40 Run hapyrdi u Agreas wa u Chakravarty neibynta ka Wicket wa 6.
Ka Meghalaya daw yaleh ko ya ka yalehke wa khaddooh pyrchah ya ka Mizoram ha kani ka 26 tarik.
