15 49.0138 8.38624 1 0 4000 1 https://wyrta.com 300 0

Miat ki dak ki chin ka lehniam Kopati Puja ka Raij Raliang hadien wa pep ko 3 snem

0 Comments
Advertisement ad1

Jowai: Ka lehniam Kopati Puja ka Raij Raliang kawa jooh man khlieh u snem, ha uni u snem won da pynman ya ka hadien 3 snem neidaw wa haap pynpep ya ka na ki daw wymye u kiar deiwa pyndep ya kiwa boon ki kaam kiwa yatoh wa kani ka lehniam.

Ka lehniam Kopati Puja toh ka lehniam yong ki San Raij San Langdoh wow e ngooh ya u Trekirot hadien wa da dep ah ya u kba wei manda pynpoi ya u khoo u kba cha jar jiar ki manyung hapoh ki Raij ka Elaka wei kamjooh leh u e ngooh ya iwon iwon i bha i miat ha uni u snem wa da lai. 

Advertisement ad1

Ki Soo San Langdoh kynthup ya ka Raij Ionglang, ka Raij Lapne, Raij Niawkmai, Raij Khonchnong wa ka Raij Raliang. 

Kani ka lehniam kawa da sdang ynnin ka sngi 25 tarik da lai bait ko nadooh i pynkhooid Khloo Blai, ka Kñia Tumar Bir, i lai thooh ya ki blang kñia, i wan i San Langdoh ha Madan Khloo Blai deiwa wanrah ya jar jiar i bhet i bhaar, ki dan ki khat kam ki ha i por miet.

Ynne ka sngi won dang step da pynman ya ka Than Blai (kutyngkong) ha yung u Sohblai (yong Sutnga), heiwa da pynman ya ka Kñia Puja ha Khloo Blai wa ka Chaad Pastieh ha Madan Khloo Blai.

Hadien ini neiliang u Wamon, u Wasan wa ki paidbah da lai ki cha Wah Ummurem wow pynkai ya ka Syntu Blai wei wow pynhær ya ki rapati iwa man kam ka dak wow beh wei wow pynkit ya ka sih ka roi ka khlam ka kjut wa iwon iwon iwa sih na u pood u ang ka Elaka wa ka Raij.

Ha i por chiteiñ sngi kam wow pynphooh ya ka Lehniam Kopati Puja, nadooh u snem 2006 da pynman ya i pynyoo rong ya ki chaad tynre na ki khon ka Raij ka Elaka wa ka yalang heiwa u montri ka sorkar uwa man leh u MLA ka Raliang, u Comingone Ymbon da man u kam u kongsan hei emlang ki MDC ka JHADC, ki Dolloi na ki Elaka waphær waphær ka ri-loom Jaiñtia.

U Comingone hawa e i klam ha kani ka sngi, hadien wa da e khublei u ya waroh da ong u wa da kyrmen u wow ye noh u sdang ya ka yung wa paka yong ka Raij Raliang Sec. School wei da booddien bha u ya kani ka kaam.

Da kyntu u leh wow man ki paidbah ka chnong kiwa lehkhooid khamtam ha ki skur deiwa kyrpaad ya kiwa sikai wow hikai ya ki khynnah kammon u lehkhooid ha skur wa ha yung ha sem khnang wow man ko kawi na ki chnong wa khooid tam ha ki snem wow wan. 

Da pynrap wa lada man ko ka chnong kawa khooid hadooh katwon u yoh myntoi ko na ki kaam uiñke suwari deiwa e nongmuna ya ka Mawlynnong wa ka Sohra ki chnong wa riñ ya kiwa uiñke da ki hajar ngut chi sngi. Da ong u leh wa lada emkaam iwon iwon ha i bynta yong i khooid i jngiar oo man u uwa smat wow yarap ya ka chnong.

Ya kani ka sngi da pynphooh da ki chaad tynre wa ha rukom wei da wan sakhi ya ka da ki spah ki hajar ngut.

Hadien wa da kut kani ka program da pynman ya ka Chaad Pastieh ha pchem yung u Sohblai (ha yong Sutnga) ha kawa da chimbynta da ki Soo Raij (ki Langdoh) wa ka Tre Raij wei neitæ won da pynbood won sa da i baam ya i doh kñia wa da e kñia nadooh i step.

Manda dep u baam ya i doh kñia da pynman won ya ka e-naam (e kyntien) hapyrdi u Dolloi, u Wamon, ki Soo Langdoh, u Harmooid, ki Dhulia, wa ki 7 Waheh ka Elaka heiwa da pynsñiaw wa ka Kñia wa ka lehniam Pynkai Syntu Blai wa i pynhær ya ki rapati da man ki kiwa miat wa bha.

Hadien ini da pynman ya ka pynngooh Sohblai wei i pynngooh ya u Langdoh Raij Raliang wa u Wasan Nohblai.

Kani ka lehniam daw pyndep ya ka mynstep i step wa kiwi kiwi.

Advertisement ad1

0 Comments

Leave a Reply