Shillong: Ya ka Project pynmih bordiñ kawa da tip kam ka Mawphu Hydro-Electric Project (Stage II) wa thmu wow pynkrehkaam da ka North Eastern Electric Power Corporation Limited (NEEPCO) ye wow pynkylla pyrtuid ka cha ka Wah Kongkhen namo ka Thieddieng neidaw wa boon ki chnong kiwa chah ktah na kani ka project toh ki kiwa naka thaiñ Thieddieng ymtoh na ka thaiñ Mawphu.
Uwa pathai khubor da yoh u wow yaklam bniah hajrong ini wa u General Manager wa pait ya kani ka kaam, u S.K. Dey.
U Dey da pyntip u wa katkam wa dawa ki paidbah ka thaiñ Thieddieng toh u kylla pyrtuid noh ka wei ini chong i ha i bor ka sorkar jylla wow leh yeiwa emkaam.
Da ong u leh wa katkam ka soskular kiwa chah ktah ki tre thaw daw e kreh ya uwi/ka wi man ki thlu yung wa chah ktah ha ka kyrdan Grade C wa D wei ki wym kwah ye ki u chim da ka poisa wa T. 5 Lak wei u su ka NEEPCO ym duna ya ka T. 2000 chi bnai wei ye ko u ku katkam i man ka yaaw hadooh 20 snem.
Najrong ini ka NEEPCO u e bordiñ ko hadooh 12% cha ka sorkar jylla katkam ka soskular.
U Dey leh da kyntait u leh yei tieñ ki paidbah wa daw tymmoh lut ka um ya ki thaw ki bhaw wei daw haap yut noh ki paidbah, wei ini waroh toh iwa bakla.
Da ong u leh wa em 74 tylli ki manyung wa chah ktah na kani ka project tangwa ym mut wa daw chah tymmoh um i yung i sem yong ki.
Chooh da ong u wa katkam ka aiñ Right to Fair Compensation and Transparency in Land Acquisition, Rehabilitation and Resettlement (Amendment) 2015, ka NEEPCO haap su ko soo chah yeiwa dooh ki paidbah nei dor wa man katni.
“I mang poisa wow chna ya kani ka project bordiñ toh T. 907.35 klur katkam u snem 2016 wei ye ko u ku katkam wa lai i por” ong u Dey.
Ka NEEPCO ye ko wow pynmih bordiñ ko hapoh 55 bnai toh 85 Megawatt wei daw em leh ki ar tylli ki tnat næ unit, kiwa ye u pynmih mar 42.5 Megawatt.
Discussion about this post