Jowai: Ka Dorbar Chnong Lad Mukhla ynnin ka 17 tarik da pynman ko ya ka General Meeting ha Dorbar Hall Lad Mukhla kamwa jooh pynman khlieh u snem neibynta wow yaklam ya phyllu yumut ya ki kaam chnong kaam thaw khamtam wow yaklam ya ka phang (Agenda) hapoh kani ka samoi krehkaam wa chisnem.
Ha kani ka General Meeting da emlang da ki spah ngut ki khon yong ka chnong nadooh ki manbei man pa hadooh ki khon kynroo ka chnong.
Da sdang ya ka yalang deiwa pynbna paidbah ya ki phang waphær waphær wei da mih ka yañia wa joor bha hei yatoh wa ki Scheme pynroi ki wow wanrah myntoi yaki paidbah wei da mih ka kawang ktieh uwi ya uwi neidaw wym biang i rukom pyllai ya kini ki Scheme kiwa wan ha ka chnong ka thaw wei ym em lai bait i rukom pynkrehkaam ya ki.
Da mih won sa i kulmar wa malu mala khamtam wym ye pynche ya ki Audit Report hapoh ka samoi krehkaam wa chisnem.
Ha kani ka sngi ka phang wa khaddooh toh yow pynthymme yaki wa kitkaam khamtam ya i kaam Waheh Chong wei ini leh ym poi i cheiwon cheiwon leh neibhah katkam ka sur yong u paidbah da em kiwa kwah wow pynneh da u Waheh Chong warim wei em won kiwa kwah wow pynthymme hadooh wa da mih biang i kulmar sa chisien.
Neiliang ki paidbah da mih ka sur wow thap da ka Vote wei neiliang u wa pyllai ya ka yalang da rai wow pynman da ka thap Vote yow lait u mih iwon iwon i kulmar.
Kani toh katkam ka khubor na u Mar Sari wa ki kattu katni ngut ki rangbah kamjooh leh kiwa kitkaam yong ka chnong.
Discussion about this post