Ka Synjuk ki Nongsynshar Shnong Par Umkhen da rai ki wym pdiang ya ka Public Hearing wow booh ya ka thaw noh jhep ha chnong Nonghali, wei neidaw wa em kiwa kyrchaan wa kiwa pyrchah yeini, da mih leh ka thma ktien wei yania hapyrdi kiwa kyrchaan wa kiwa pyrchah ynne.
Ya kani ka Public Hearing da booh wow pynman da ka Meghalaya State Pollution Control Board (MSPCB).
U President ka Synjuk, u Supar Rngaid da pynsñiaw u yei sñiawsih hajrong ini i thmu ka sorkar wow booh yei thaw noh jhep ha kani ka thaw neibhah daw ktah ko ya ka wah Umkhen, kawa man ka tyllong um wa psa ya ki paidbah ka thaaiñ.
Hachwa wow poi cha ka thaw pynman ya ka Public Hearing, neiliang ka chnong Nonghali da booh ko da ki bru wa yang yow khanglaad yeiwa thmu wow lai pyrchah, iwa da man i daw wa da mih i yania hapyrdi ka Synjuk wa ki Volunteer ka chnong.
Neidaw wym yoh laad wow lai cha ka Public Hearing, u President ka Synjuk da ong u wa daw chong yalang wei daw e leh da ka chithi cha ka sorkar neibhah wym yoh ki wow psiah cha ka thaw wa pynman ya ka Public Hearing kawa man leh ka yalang neibynta ki paidbah.
U Supar da pynsñiaw u yei chrai ya ka chnong Nonghali wa booh ki da ki Volunteer yow khang luti chapoh ka yalang paidbah. Da ong u leh wa neiliang ki bor yong ka District da e ki da ka chithi cha ki wow pynlang paidbah yow wan ap u sñiaw ya ka yalang paidbah tangwa ym yoh ki tang wow psiah leh cha ka kani ka thaw deiwa chah khanglaad.
Discussion about this post