Shillong: Ka yakhih wow pyrchah ya ka Citizenship Amendment Bill (CAB) ynnin i janmiet ha Shillong da heh wei joor syndet i wei da mih ka kawang moo hapyrdi ki pulit wa ki kattu katni ki bru paidbah wym tipmit.
Ini i kulmar da mih ha Motphran hadien i lai paidbah na Madan Ïewrynghep, Shillong ya iwa da pynkut ha Motphran wow pyrchah ya ka CAB wa ya ka sorkar BJP kawa da mynjur ya kani ka Bill ha waroh artylli ki yung dorbar Parliament.
Manda poi ki paidbah wa lai Rally da em chwa ki paidbah wa yang ha Motphran kiwa lai cha ka yalang pyrchah CAB ha Mawkhar laad YMCA wa pynman da ka KSU.
Tangwa napyrdi yong kini da em ki kattu katni ki bru wa neh ha Motphran wei da sdang ki wow pynhær ya ki moo cha ki pulit. Manda joor i kawang moo, ki pulit leh da pynuiñ kylla ki da ki moo wei da siat ki da ki kattu katni ki tdem pynjhia khmat yow pynpra ya kitai ki paidbah. Kat hadooh wa yoh ya kani ka khubor, ym pu yoh yutip wa lada em iwon iwon i pynmynsoo na waroh arliang.
Neiliang ka KSU da kyntait wa embynta ko ha kani ka kawang moo, neibhah da sakhi wa ka yalang paidbah da emlang kiwa yahkhmat rangbah ka seiñ, kawa da lai bait wot hapyrdi i kulmar ha Motphran.
Rap hadien, i kawang moo da sangeh noh wei i long i man da man ko kawa rap jai jai, neiliang ki pulit leh da sangeh noh ki wow beh næ yaleh pyrchah ya ki paidbah deiwa ki e laad ki wow wan toor cha ka thaaiñ Motphran, wei ha katai ka thaw, ki paidbah da pynman noh ki da ka yakhih wa jai jai, du da iwa kbai pyrchah ya ka CAB wa ya ka seiñ BJP, wei kamjooh da kbai yei dawa ILP ha kani ka jylla.
Discussion about this post